Friday, April 3, 2009

الطير المهاجر..ورحلة البحث عن وطن


غريب أوى التغير اللى بيحصلنا بمرور الوقت

تتغير الظروف..وعمرك يزيد كام رقم

تلاقى نفسك واحد تانى

من صغرى وانا بحب بلدى

ممكن زى أى حد...ولما وعيت وفهمت شوية

حبيت عبدالناصر

وزمنه...وأحلام الوحدة..واننا نقول.....لأ

لما دخلت الجامعة...كانت أحر مناقشة تشوفها بينى وبين اولاد الخليج

المصريين اللى اتربوا فى الكويت أو الأمارات

وتذمرهم المستمر من البلد..الفوضى..الفساد...الزبالة

وكنت اتجنن لما حد منهم يقول انه حاسس ان بلده مش مصر

بلده اللى اتربى فيها

على أخر سنة فى الكلية كانت حدتى عموما ابتدت تقل

وأرأى العنيفة ابتدت تاخد اتجاه تانى

ابتديت اتخنق من البلد

ومع دخولى عالم العمل

حطيت اول وأخر هدف ليا لحد دلوقتى

إنى أسيب البلد دى

اتغرب كام سنة...واحوش قرشين ابدأ بيهم حياتى هنا...قصدى فى مصر

والغريب إن أصحابى اللى كنت بتخانق معاهم وبتهمهم بعدم الإنتماء (اولاد الخليج) كانوا ابتدوا يتعلقوا بالبلد

وفى الوقت اللى أهلم كانوا بيطالبوهم بعد إنتهاء الدراسة بالعودة للبحث عن عمل

كانوا بيموتوا عشان سايبين مصر

أشغلت وخدت الخبرة اللازمة وسبت البلد

وعلى قد ما سعيت لده

على قد ما بكيت وانا باستلم تصريح السفر

حسيت فى اللحظة دى بس إنى مسافر

سايب البلد اللى ياما قلت بحبها

وقاعد فيها بزبالتها وفسادها وكل مافيها

اللى قلت زمان انها مش حتتصلح إلا بينا

جيت على السعودية

غربة...خنقة...مجتمع مختلف كتيييييييييير عن مصر

أحسن أو اوحش ده مش مهم

بس مختلف

وللأسف ابتديت احس إنى بتغير

من ناحية الشغل كان تغير إجابى..لأن ببساطة مفيش فى حياتى حالياُ غيره

بس النواحى التانية مش عارف

أول أجازة نزلت فيها مصر بعد السفر بستة شهور

كانوا اربع أيام شغل

مروا بسرعة

بس شفت الشتا فيكى يا بلد..وسمعت نجوم أف أم

وحضرت الفالنتاين

تانى مرة كانت شهر..بعد سنة من الغربة

كان الغريب فى الأجازة دى

إنى قضيت اول 12 يوم بسمع بس

والناس اللى حواليا مش فاهمة مالى

وانا نفسى مش فاهم

ساكت..بسمع...مضطرب احيانا

مش متعود على العدد الكبير ده من الناس اللى بتحبها حواليك مرة واحدة

ماهو الغريب ان الناس كلها بتوحشك فى الغربة

بتفتقد كل حاجة حلوة فيهم

ومرة واحدة أهلك..أصحابك..النيل ..والليل..السهر

فى خطوبة واحد صاحبى...اللى على أخر الأجازة خسرته

خفت ارقص

حتى ولو دقيقة

حاسس ان الناس كلها بتبصلى

على اخر ال12 يوم رحت لدكتورة نفسية

وملقتش عندها الراحة

تانى سنة قربت تخلص

والمشكلة اللى عشانها بكتب كل ده

(أه يا مدونتى...ياللى مبكتبش فيكى الا المشاكل)

انى دلوقتى وقت الخطوة التانية فى حياتى

اللى مش عارف هية ايه

اللى شايفه قدامى دلوقتى واحد من تلاتة

اما اقعد اكمل هنا فى الشركة اللى بشتغل فيها

وهنا مشكلتين

الترقية مش مضمونة لأنها على اللى الواحد شايفه بتعتمد اكتر مش عليك على غيرك

واسطة...like and dislike...حاجات كدة

تانى حاجة..إنى فعلاً مش هقدر اكمل فى الرياض كام سنة كمان

انا دلوقتى بموت

والترقية
(اللى مش مضمونة)


معناها خمس ست سنين على اقل تقدير فى مملكة الخوف

تانى سكة ارجع مصر

:)

كان نفسى والله...بس مفيش مكان

الهوا فى مصر مبقاش صالح للأستخدام الأدامى

شغل فين..وهتاخد كام..وهتعمل ايه..وتتجوز ازاى...وتربى ولادك وتعلمهم ازاى

مصر مش واردة

تالت حاجة ودى اللى العقل بيأيدها

هجرة

استراليا مثلاُ

مش هجرة هجرة...تطلع تدرس..تشتغل..كام سنة وترجع بلدك حاجة جامدة

مش قادر

شايف ان دى خطوة منطقية

بس مش قادر اخدها

ترجع بلدك بعد كام سنة بقرشين..ولا بمية ومعاهم شهادة من جامعة معتبرة

تعيش نقول عشر سنين فى استراليا...وترجع بتتكلم كام لغة

ولا تقضيهم فرضياُ فى السعودية وترجع عندك تخلف عقلى

وولادك يكونوا خلاص ربوا عقد صعب يتعالجوا منها

(انا شايفها كدة)

المشكلة فى موضوع استراليا ده انى لما سافرت اوروبا مع الشركة..حاسيت بغربة اكتر بكتير من اللى فى الخليج

غربة كانت هتموتنى

فكرتنى بإيام زمان لما كنت اطلع معسكر مع المدرسة فى الصيف

يومين وكنت بموت عشان ارجع بيتنا

حاجة تانية

بعد التعود على الحياة فى مجتمع زى استراليا...هتقدر ترجع

طب ولادك

اللى هيكون معاهم الجنسية...هيرجعوا؟

طب لو رجعوا هيكملوا؟

واحد صاحبى قالى هما لما بيدوك الجنسية سواء فى استراليا أو كندا

هما عارفين كويس انك مسلم..مصرى...أو عربى..عمرك ما هتكون كندى

متربى فى بلدك....ومشبع بتقاليدك

هما بيراهنوا على الجيل التانى...أو التالت

الكلام ده وجعنى

وافتكرت برنامج شفته على الجزيرة..بيحكى عن المهاجرين العرب

وازاى ان الجيل التالت هو اللى بتنقطع عنده العلاقة بينه وبين الأصل

وأفتكرت ..ان الجيش الأمريكى اللى دخل العراق...20% منه مسلمين

طب ايه.....؟؟

********

حاسس انى فى صراع جوايا...بين ما كان بداخلى

وما صار الأن فى عقلى

حاسس اكتر انى بقيت مركز فى الطبقة الخارجية منى

حاسس إن فيه قشرة حواليا

وإنى مركز فى القشرة دى

زمان...كنت بحس انى جوانى قوى