Tuesday, March 25, 2008

All of your contact are offline......

بتخنق اوى لما اشوف الجملة دى
عارف لما تبقى داخل على النت..بتدور على حد تتكلم معاه
وتلاقى كله نايم...كله اوف لاين
طب تخيل بقى لما يكون ده احساسك العام فى الحياة
ان كل اللى حواليك اوف لاين
ببساطة متغرب...وفى الغربة مفيش اصحاب
ايوة مفيش اصحاب
دى الحقيقة اللى وصلتلها بعد حوالى سبع شهور فى الغربة
ممكن يكون السبب فى السن..ان احنا كبرنا وخلاص مفيش وقت ولا اعصاب انك تستحمل ناس جديدة فى حياتك
بعيوبهم قبل مميزاتهم
فإن كان ممكن يحصل وانت فى بلدك
فما بالك بالغربة
المكان اللى فيه كلهم كانوا نفسهم يبقوا مش فيه
فاهمنى..؟؟
يعنى مجتمع كل اللى موجود فيه جاى بصفة مؤقتة
لأهداف مادية اولاً..وثانياً
ولو فيه اهداف تانية فأكيد مش من ضمنها ان يعرف ناس جديدة
يعرفهم لحدود الصداقة
ممكن زمالة عمل... بس بعد كده نفض
من كام يوم كنت قاعد بفتكر شلة مصر
اصحابى اللى فعلاً طلعت بيهم من الدنيا
وافتكر حاجات..وأضحك وانا لوحدى
وفجأة ظهرت حقيقة قدام عنيه كإنى بشوفها لأول مرة
انه خلاص
الشلة والقعدة...وشقة المعادى..ووقفة المقطم
وكل حاجة حلوة جمعتك بأصحابك فى مصر
خلاص
اصلاً كل واحد من الشلة دى بقى فى بلد
اللى فى الكويت ..واللى فى البحرين..واللى فى قطر
واخوكم فى السعودية
مش هتجمعنا بعد كدة غير اجازات
وياترى من يكون موجود....ومين اللى هنفتكره
ونتصل بيه ونقوله..القاعدة نقصاك
حتى القعدة فى الاجازات دى هتكون غير زمان
اماكن مختلفة...وأوقات مختلفة
مش هيبقالنا غير إننا نفتكر ايام زمان
اللى بقت خلاص
زى ايام عبد الناصر كدة
او بطريقة اخرى زى ايام ابتدائى واعدادى..وثانوى..وكلية
مراحل...حياتك مراحل
ولازم تتعود على كدة
وتتعود كمان ان كل مرحلة اسؤ من اللى قبلها
التاريخ بيقول كده
يعنى دلوقتى انا فى مرحلة الغربة..ما قبل الزواج
والله وحده اعلم...ما هو عنوان المرحلة القادمة
وبمناسبة مرحلة الغربة ما قبل الزواج
طول عمرى كان نفسى اعيش لوحدى
كنت بقول انا هبقى سعيد....لو سكنت لوحدى
بختار شقتى..عفشى..وكل حاجة الاقيها مكان ما اسيبها
بعد شوية غربة..وعيشة منفردة
هما مش شوية..اكتر
اكتشفت ان حاجة زى انك تلاقى كل حاجة مكان ما انت سايبها
بتعمق احساسك بالوحدة
بتفتقد انك تزعق وتقول...فين اسمه ايه اللى كان هنا
بتفتقد انك تكلم حد قبل ماتنام
بتفتقد الصحيان الصبح على صوت حركة فى البيت
وتبدأتقعد بليل وتخش على النت يمكن تلاقى حد تتكلم معاه
ولما ما تلقيش..تفتح مدونتك وتكتب
عن ايام مش راجعة تانى
وعن احساس بالوحدة..بيقتلك كل يوم عن اللى قابله

Thursday, March 20, 2008

من منى لى منى..يا قلبى لا تحزن

النهاردة شفت حلقة العاشرة مساءً بالصدفة
منى الشاذلى فى حوار مع رفعت السعيد..رئيس حزب التجمع
النهاردة تانى....بالصدفة برضة منى الحسينى جايبة واحد كدة المفروض انه رئيس حزب الكرامة
هيه موضة.....؟؟
وكله بيتكلم عن البلد..والقمع...والحزب الحاكم و و و و و
هوه فيه ايه؟؟
ماشى موضة والمذيعين راكبنها
بس الحكومة ساكته ليه..؟؟
نوع من انواع التنفيس عن الشعب عشان ميفرقعش فى وشهم
ماشى
الشعب بقة فين...؟؟
فعلاً بيسمع الكلام ده........؟؟
طب لو سمعه فعلاً بيهديه...؟؟
بينسيه سعر الرز والزيت...والكام مطوة اللى مستنينه فى طابور العيش...؟؟
مش هقول اسعار الشقق
لأن دى بيقت مشكلة المتغربين
هما دول...اللى من حقهم يحلموا...ويخططوا عشان يلاقوا اربع حيطان تلمهم
أما اللى فى مصر...فمعتقدش ان فيه شاب عاقل بيشتغل شغلة شريفة ممكن يفكر يجيب شقة لنفسه بنفسه
طب ايه برضة؟؟
مصر بقى فيها حالة غريبة
مش قادر افهمها
مش عارف هل ده بسبب انى بعدت عنها
ولا بسبب انها داخلة على مرحلة هي نفسها مش فهماها

Sunday, March 9, 2008

من وحى الغربة

" أنا مش هتكدر لوحدى.........لازم تبقوا عرفين..لو هتكدر..هنكدر كلنا "
هكذا صرخت وأنا فى وسط الشقة
موجها كلامى للانتريه والسفرة
متعمد ان اعلى صوتى..حتى يصل إلى حجرة النوم
فغداً المقابلة الحاسمة
أما يصير عقد الشقة بإسمى
وأما ابحث أنا وثلاث حجرات عن مكان اخر
(يلعن ابو العوايل على العزاب على السعودية..ولكل كليلة )