Monday, October 8, 2007

فضفضة شاب متغرب


المفروض ان شغلتى الدعاية...دعاية يعنى علاقات وقدرة اكتر من العادى على فهم الناس وكسبهم

والمفروض ان شاطر فى شغلى

على اساس انى كنت شغال فى شركة اجنبية كبيرة فى بلدى لحد ما ربنا وفقنى واتنقلت لشركة متقلش عنها هنا فى السعودية

والحمد لله على ده الف مرة

بس فى مشكلة..؟؟

كتير حذرونى من المصريين بالذات فى الغربة...وعشان دى اول مرة اسيب مصر كان لازم اخد الكلام ده حلقة فى ودنى

واللى يخنق ان بالرغم من ان كل الشركة عندى مصريين اللى انهم غراب

دى الكلمة الوحيدة اللى قادر اعبر بيها عن اللى جوايا نحيتهم

مش عارف اتعامل معاهم

انا اللى شغلى ان اعمل علاقات بسهولة مع الناس ايا كان جنسيتهم

لاقى صعوبة كبيرة فى التعامل مع ولاد بلدى

صعوبة تصل لحد كلمة صباح الخير

اصل عشان انا فى الفرع الرئيسى للشركة فى المملكة...فى بشر كتير بتحتك بيهم كل يوم وانت داخل اوضتك

ناس تقابلك فى يوم وتخدك بالحضن كأنكم اصحاب

تانى يوم تقف تسلم عليهم....يسلم عليك بطراطيف صوابعه

ايه النظام...؟؟

مش فاهم

مش عارف اتعامل

ناس جاية تحوّش لاخر قرش...حقه

بس مش حقه ان ينفسن عليك لما يلاقيك بتاخد شقة فى حتة اغلى من اللى ساكن فيها

مش عشان هوه جايب سرير حديد ومرتبة بمتين ريال

يضايق لما يعرف انك صارف قد كدة على اوضة النوم بتعاعتك

يضايق ازاى..؟؟

يبتدى يحاول يحسسك انك عبيط

طيب انا الحمدلله واثق قى نفسى وتفكيرى بس طريقة التعامل دى غريبة عليا

مش عارف ايه المفروض يكون رد فعلى خصوصا ان الموضوع بيتجاوز الكلام الهايف ده ويوصل لحد تفاصيل شغلك

ما اهو انا جديد

ولو فى واحد جاى قبل منك بأربع شهور بس وهوه خريج احدث منك ومعاه خبرة اقل يبقى هوه القديم وانت الجديد لانج

عادى

بس لما تكون دى حجة انك تشيل قرف الشغل كله من على كتاف الشباب وتشتغل انت 16 مكان وهما مكانين يبقى ايه..؟؟

اكيد مش لا

هنا فى الغربة متقولش لا من اولها كدة

الناش لسة لا شافت منك لا شغل ولا حاجة

طب ده الشغل والناس اللى فى الشغل

برة الشغل حياتى مع واحد من الناس اللى كنت اعرفها فى مصر...اعرفها معرفة معقولة

وجاى قبلى بأربع شهور..وبيشتغل فى شركة تانية

جميل

ساكنين مع بعض....بس فى مشكلة

الشخص ده اللى هوه اقرب واحد ليك هنا الحياة بالنسباله مصلحته وبس

يمكن منكونش قربنا فى مصر كفاية انى اعرف حاجة كدة

بس هنا الموضوع ظاهر

مدخلنى فى قصص كتير انا مش حملها وانا لسة جاى مبقاليش شهر وكام يوم

غير كدة مش مرتاح معاه

حاسس انه حاطط ميت حاجز بينى وبينه بيطلعوا لما هوه يعوز

ومش عارف اتعامل معاه ازاى

لو خسرته مفيش حد تانى هنا معرفتى بيه تشجعنى انى اسكن معاه او حتى احاول ابدأ معاه صداقة من اى نوع

ولو سكنت لوحدى هتجنن

مش عارف مهنج

كل دول بقابلهم كل يوم من ساعة ما جيت

لحد ما حسيت انى مشلول فى تفكيرى وسبت كل واحد يعمل اللى هوه عاوزه

اللى ميسلمش ما يسلمش

والشغل اللى عايزين تدوهولى انا حلبسه زى ما انتوا عايزين

ورفيق الغربة قشطة...كفاية انى بلاقى حد اشتكيله فى اخر اليوم

كل ده يخليك تفكر فى الجواز بصورة مختلفة

مش كل ده بس

وجودك فى بلد بيعامل العزاب كأنهم كفار يخليك تنزل تتجوز وترجع تانى يوم

وتطلع زى ما تطلع

مولات مقفولة فى وش العزاب اربع وخميس وجمعة ....عوايل بس

وعوايل دى يعنى عائلات

اربع وخميس وجمعة وانت اجازتك خميس وجمعة

عادى

طب فى ايه غير المولات اكيد فى حاجة تانية تتعمل

اه فيه

ممكن تقعد على قهوة والقهاوى هنا نوعين

جوة الرياض ودى شبه سيلانترو كدة عندنا فى مصر مفيهاش شيشة

الشيشة ممنوعة جوة الرياض

عايز النوع التانى بتاع الشيشة خد عربيتك واطلع حوالى تلاتين كيلو برة الرياض

عادى

حياة جديدة عليا...ومجتمع البقاء فيه للمتزوجين فقط

اتجوز...؟؟

طب ازاى وانا هنا اصلا مبشوفش غير خيلات سودة بتتحرك

مصر..؟؟

طب هية اجازة شهر تكفى ان تشوف واحدة وتعجبك وتخطبها وبعد كدة تكلمها على النت زى المراهقين فى محاولة لسبر اغوارها

وهوبة تيجى اجازة العيد تنزل تجيبها وتيجى

ولما تخلص شغلك وترجع البيت تلاقى واحدة غريبة مستنياك

ياريتها امك او اختك دى واحدة متعرفهاش

تلاقى نفسك بتقف على الباب وتقول مين دى...؟؟

طول عمرى رافض جواز الصالونات

مطلوب منى دلوقتى اتجوز صالونات واعرف خطيبتى عن طريق النت بعد كدة

اه

دى اه من جوة والله

اخيرا العيد داخل

والرجالة اللى موجودة فى الرياض خالعة على مصر

وانا قاعد

بفكر انزل لصديق ليا فى جدة فى محاولة لتفادى انى اقضى العيد لوحدى او مع ناس مش بحبها

او قول مش طايقها

مسافة الف كيلوا بالعربية بس مش مهم

انا لها

وعلى رأى الشاعر اللى قال

رب شاب كان عايش فى مصر وسط اصحابه واهله

يلاقى نفسه فجأة فى الرياض وبيقضى العيد لوحده


وعجبى