Thursday, July 26, 2007

إيمان!!!!!!؟


هل املك من الشجاعة ان اكتب عنكِ..؟

***

ايه هوه الحب...؟؟

نوع من انواع الضعف

ضعف تحبه اكتر من اى شيىء تانى

طب ليه ضعف...؟؟

لأن ببساطة انا كراجل...المفروض انى انسان قوى

قوى فى الشغل ...فى الشارع...فى البيت مع اهلى...حتى مع اصحابى المفروض اكون قوى

اظهار الضعف فى اى من المشاهد دى بيسبب مشاكل اكتر من الراحة اللى ممكن تعود عليك

الراحة اللى بتيجى لما تعيط مثلاً

وانا مبعرفش اعيط

ايمان...؟؟

مين ايمان...؟؟

بنت وحيدة عايشة مع امها لأنها من اول ما كبرت وابوها مع زوجة تانية

دايما اغلب القصص دى بتبدأ بإنفصال

الأب اتجوز...وساب الام مع البنت

الام ربت البنت على كره الأب...واى اب...واى راجل

بس فجأة ظهر عريس للأم....وفجأة الأم وافقت

واتقلب الموقف المقدس المعادى للرجال

طب ايمى....كان عندها 17 سنة فى الوقت ده

فوجئت براجل غريب فى البيت و بأمها بتتخطف منها

طب هى اصلاً صدقت العقَد اللى كانت امها بتحاول تزرعها فيها

لا...قالت اشوف بابا واحكم

اشوف الرجالة واحكم

حاولت تشوف أبوها...راحت لبيته التانى رد عليها من ورا الباب

وكانت صدمة ليها انه حتى مرضيش يقابلها

شوية الاب تعب ودخل المستشفى فى حالة خطيرة...طلب يشوفها وكان السبب فى الطلب ده انه كان عايز يوصيها على اخوتها

من الزوجة التانية...ما ايمان كبرت...وممكن تشيل مسئوليتهم لو حصله حاجة

ومحصلوش والحمد لله

وكانت دى اول واخر مرة تشوفه

طب الأم....؟

بسبب سن ايمان...وبسبب التنازع على اهتمام الام..ووقتها بين الزوج الجديد والبنت

قرر الزوج انه يستقر فى بلد اهله فى الفيوم....والام تعيش على خط القاهرة الفيوم

والبنت تبات لوحدها عادى

ما ايمان راجل

ومبتعملش حاجة غلط...والتليفون موجود

تحس كدة انه فيلم عربى قديم

لسه فى ناس كدة

طب ايمان....؟؟

فى جو الكلية او المعهد معرفش لحد دلوقتى بس عموما عرفت ناس وشباب وخروجات و و و

بحدود...ايوة بحدود

بس اى حدود...؟؟

حدود الدين ولا الأسرة ولا المجتمع...؟؟

واشتغلت فى مكتب سفريات...وبدأت تدوب فى الدنيا إلا برة البيت

البيت اللى مش موجود

اتعلمت ازاى ان اى راجل بيقابلها او حتى شاب بيبصلها ازاى

ووسط شلة بنات جمعتهم نفس الظروف

شافت وعرفت وشربت

بحدود برضة....!!!؟

وبعد كل ده

قابلتها انا

لسه مكملتش 22 سنة

جميلة

شكلاً وشخصاً

عمرك ما تزهق وانت معاها

جميل

وبعد كام مقابلة عرفت القصة دى حته حته

تعاطفت معاها لأقصى درجة

وحاوت بكل الطرق والكلام انى اقولها ان الدنيا كدة

وان كل الناس اللى انتى شايفاهم حواليكى دول

مهما كان مستواهم فمشاكلهم اكبر مما تتخيلى

حاولت

وهى بإصرار حاولت تحسسنى اكتر بمأساتها

العلاقة بينا كانت مش اكتر من خروج وسهر فى اماكن عامة سوا

ممكن كنت بحاول اعوضها

ممكن كنت مستمع بانى اساعد انسان اضعف منى

بس العلاقة بدأت تخش فى سكة مش بتاعتى

خفت تتعلق بيا وانا اصلا سايب البلد وماشى

وهى عارفة ده

حسيت انها بتتعمد تكسب تعاطفى نحيتها...ممكن لانها عارفة انه السبب الأول فى استمرار العلاقة

وبدأت احس انى غلط

وبدأت احس اكتر انها بتتعمد كل كلمة بتقولها

عارفة بالظبط الكلمة دى هتسمع عندى فين

والانسان لما يكون ضعيف فى جانب من شخصيته بيحاول دايما انه يخفيه

لأنه عيب دائم...مثلا لو اتولدت لقيت ابوك تاجر مخدرات مثلاً

مش هتمشى تقول لكل الناس انا ابويا كذا ولا كذا

ويمكن كانت زى كل البنات اللى عرفتهم على اختلاف اشكالهم وثقافتهم

بتحاول تحطك فى خانة العريس

حتى لو ظروفك غير ظروفها...حتى لو عارفها فى الشارع

بتحاول...وبسهولة بتعرف انك مش منهم

فتبقى اى حاجة تانية انت عايزها غير فكرة العريس دى

تبقى صاحب...حبيب...عشيق

انت وحدودك...وهى وحدودها

المهم اختفيت...بعد موصلّت تقريباً كل الكلام ده ليها بطريقة او بأخرى

خايف عليها...انا مش هاخسر حاجة بس لا

مش هيبقى ابوها وامها وجوز امها وكام واحد قبلى وانا عليها

حتى لو بإرادتها

قفلت موبايلى واختفيت...وهى فهمت ده

وساعدنى انى سبت شغلى استعداداً للسفر

عرفتها 3 شهور

واختفيت 3 شهور

قاومت فيهم الأحساس الغبى بالوحدة اللى عايش جوايا

وقررت انى مكسرش قاعدة رقم اتنين

" لا تستعدى علاقات من الماضى "

بس عن طريق صاحب مش صاحب

جابت هيا نمرة البيت...واعلنت انها مش هتستسلم

اما انا...؟؟

اتلككت وكلمتها تانى...وقابلتها تانى وتالت ورابع

سفرى اتأخر...والقاعدة رقم اتنين غابت وراء الشمس

***

فى ناس لما تقابلهم يأسروك بحاجات معينة فيهم

ماهو مش لازم تفضل انت الواد الجامد الصايع اللى قلبه من يوم اتكسر وهوه زى الحجر

فاهم الناس كلها

وجايب من الأخر

انا اصلا مش كدة

وايمان برغم انى عارف ومتأكد ان فى حاجات كتير جداً فى حياتها مخفية عنى

إلا انها شدتنى

شدتنى بعد فترة عرفت فيها بنات كتير

شغل وعيلة وأصحاب

وولا واحدة شدتنى اصلا انى اخد نمرة تليفونها

طب ايمان وحشة ولا حلوة...؟؟

فى نظرى حلوة

ولو كنت مخدوع....فانا مبسوط

لأنى بقالى فترة كبير متخدعتش

***

عارف الناس اللى لما تجيب سيرتهم عينيك تلمع

عارف الناس اللى بتكسر قاعدة فى حياتك عشنهم

بلاش

عارف ايمان..؟؟

اللى لو كنت قابلتها فى ظروف غير دى

وفى زمن غير ده

كنت ممكن تقرا كلام تانى خالص هنا

اديك عرفت

***

"ايمان....اسف لأنى مقدرتش اسيب فى حياتك غير شوية ذكريات...اتمنى انها تكون سعيدة"