Monday, October 8, 2007

فضفضة شاب متغرب


المفروض ان شغلتى الدعاية...دعاية يعنى علاقات وقدرة اكتر من العادى على فهم الناس وكسبهم

والمفروض ان شاطر فى شغلى

على اساس انى كنت شغال فى شركة اجنبية كبيرة فى بلدى لحد ما ربنا وفقنى واتنقلت لشركة متقلش عنها هنا فى السعودية

والحمد لله على ده الف مرة

بس فى مشكلة..؟؟

كتير حذرونى من المصريين بالذات فى الغربة...وعشان دى اول مرة اسيب مصر كان لازم اخد الكلام ده حلقة فى ودنى

واللى يخنق ان بالرغم من ان كل الشركة عندى مصريين اللى انهم غراب

دى الكلمة الوحيدة اللى قادر اعبر بيها عن اللى جوايا نحيتهم

مش عارف اتعامل معاهم

انا اللى شغلى ان اعمل علاقات بسهولة مع الناس ايا كان جنسيتهم

لاقى صعوبة كبيرة فى التعامل مع ولاد بلدى

صعوبة تصل لحد كلمة صباح الخير

اصل عشان انا فى الفرع الرئيسى للشركة فى المملكة...فى بشر كتير بتحتك بيهم كل يوم وانت داخل اوضتك

ناس تقابلك فى يوم وتخدك بالحضن كأنكم اصحاب

تانى يوم تقف تسلم عليهم....يسلم عليك بطراطيف صوابعه

ايه النظام...؟؟

مش فاهم

مش عارف اتعامل

ناس جاية تحوّش لاخر قرش...حقه

بس مش حقه ان ينفسن عليك لما يلاقيك بتاخد شقة فى حتة اغلى من اللى ساكن فيها

مش عشان هوه جايب سرير حديد ومرتبة بمتين ريال

يضايق لما يعرف انك صارف قد كدة على اوضة النوم بتعاعتك

يضايق ازاى..؟؟

يبتدى يحاول يحسسك انك عبيط

طيب انا الحمدلله واثق قى نفسى وتفكيرى بس طريقة التعامل دى غريبة عليا

مش عارف ايه المفروض يكون رد فعلى خصوصا ان الموضوع بيتجاوز الكلام الهايف ده ويوصل لحد تفاصيل شغلك

ما اهو انا جديد

ولو فى واحد جاى قبل منك بأربع شهور بس وهوه خريج احدث منك ومعاه خبرة اقل يبقى هوه القديم وانت الجديد لانج

عادى

بس لما تكون دى حجة انك تشيل قرف الشغل كله من على كتاف الشباب وتشتغل انت 16 مكان وهما مكانين يبقى ايه..؟؟

اكيد مش لا

هنا فى الغربة متقولش لا من اولها كدة

الناش لسة لا شافت منك لا شغل ولا حاجة

طب ده الشغل والناس اللى فى الشغل

برة الشغل حياتى مع واحد من الناس اللى كنت اعرفها فى مصر...اعرفها معرفة معقولة

وجاى قبلى بأربع شهور..وبيشتغل فى شركة تانية

جميل

ساكنين مع بعض....بس فى مشكلة

الشخص ده اللى هوه اقرب واحد ليك هنا الحياة بالنسباله مصلحته وبس

يمكن منكونش قربنا فى مصر كفاية انى اعرف حاجة كدة

بس هنا الموضوع ظاهر

مدخلنى فى قصص كتير انا مش حملها وانا لسة جاى مبقاليش شهر وكام يوم

غير كدة مش مرتاح معاه

حاسس انه حاطط ميت حاجز بينى وبينه بيطلعوا لما هوه يعوز

ومش عارف اتعامل معاه ازاى

لو خسرته مفيش حد تانى هنا معرفتى بيه تشجعنى انى اسكن معاه او حتى احاول ابدأ معاه صداقة من اى نوع

ولو سكنت لوحدى هتجنن

مش عارف مهنج

كل دول بقابلهم كل يوم من ساعة ما جيت

لحد ما حسيت انى مشلول فى تفكيرى وسبت كل واحد يعمل اللى هوه عاوزه

اللى ميسلمش ما يسلمش

والشغل اللى عايزين تدوهولى انا حلبسه زى ما انتوا عايزين

ورفيق الغربة قشطة...كفاية انى بلاقى حد اشتكيله فى اخر اليوم

كل ده يخليك تفكر فى الجواز بصورة مختلفة

مش كل ده بس

وجودك فى بلد بيعامل العزاب كأنهم كفار يخليك تنزل تتجوز وترجع تانى يوم

وتطلع زى ما تطلع

مولات مقفولة فى وش العزاب اربع وخميس وجمعة ....عوايل بس

وعوايل دى يعنى عائلات

اربع وخميس وجمعة وانت اجازتك خميس وجمعة

عادى

طب فى ايه غير المولات اكيد فى حاجة تانية تتعمل

اه فيه

ممكن تقعد على قهوة والقهاوى هنا نوعين

جوة الرياض ودى شبه سيلانترو كدة عندنا فى مصر مفيهاش شيشة

الشيشة ممنوعة جوة الرياض

عايز النوع التانى بتاع الشيشة خد عربيتك واطلع حوالى تلاتين كيلو برة الرياض

عادى

حياة جديدة عليا...ومجتمع البقاء فيه للمتزوجين فقط

اتجوز...؟؟

طب ازاى وانا هنا اصلا مبشوفش غير خيلات سودة بتتحرك

مصر..؟؟

طب هية اجازة شهر تكفى ان تشوف واحدة وتعجبك وتخطبها وبعد كدة تكلمها على النت زى المراهقين فى محاولة لسبر اغوارها

وهوبة تيجى اجازة العيد تنزل تجيبها وتيجى

ولما تخلص شغلك وترجع البيت تلاقى واحدة غريبة مستنياك

ياريتها امك او اختك دى واحدة متعرفهاش

تلاقى نفسك بتقف على الباب وتقول مين دى...؟؟

طول عمرى رافض جواز الصالونات

مطلوب منى دلوقتى اتجوز صالونات واعرف خطيبتى عن طريق النت بعد كدة

اه

دى اه من جوة والله

اخيرا العيد داخل

والرجالة اللى موجودة فى الرياض خالعة على مصر

وانا قاعد

بفكر انزل لصديق ليا فى جدة فى محاولة لتفادى انى اقضى العيد لوحدى او مع ناس مش بحبها

او قول مش طايقها

مسافة الف كيلوا بالعربية بس مش مهم

انا لها

وعلى رأى الشاعر اللى قال

رب شاب كان عايش فى مصر وسط اصحابه واهله

يلاقى نفسه فجأة فى الرياض وبيقضى العيد لوحده


وعجبى

Thursday, September 6, 2007

يا هلا...الرياض

- الو...ايوة يا ماما
-....................
-انا فى الرياض دلوقتى...وصلت الساعة اتين
-...................
-الحمدلله...كله زى الفل
-..................
-دى نمرتى هنا...اه اشتريت خط اول ما وصلت
-.................
-طمنى انتى بابا واخواتى
-................
-متقلقيش....الناس هنا محترمين اوى
-................
-خلى بالك انتى من صحتك
-...............
-لا إله إلا الله

Saturday, August 25, 2007

هنا القاهرة

اخر يوم ليا فى بيتنا
اخر ليلة هنام على سريرى
زى دلوقتى هاخد شنتطى واطلع على المطار
احساس غريب
مش عارف خوف..ولا توتر...و قلق
مش عارف
اول مرة اسافر
واول مرة هغيب عن بيتنا كل المدة دى
زمان كنت لما اسافر يمين جوة مصر فى اى حتة
كانوا هما يومين واحن لبيتنا
احن لدنيتى إللى عارفها وعارفانى
دلوقتى الواحد بختار انه عن يتغرب عن بيته واهله واصحابه بأرادته
أو يمكن غصب عنه
بس بيختار
يختار انه يبعد
ويبدأ حلمه من جديد..فى مكان تانى
مكان متربطوش بيه أى حاجة
يعنى ملوش فيه ذكريات
مش عارف ايه اللى انا بكتيه ده
انا هنام
تعبان
ومش عارف امتى هرجع اكتب هنا تانى
بس اكيد باسرع وقت
إلى اللقاء قريبا بإذن الله
فان

Sunday, August 19, 2007

لا تقرأ هذا الكلام


هل ممكن احساسك بالوحدة يخليك تتعلق بوهم....؟؟


وهم ايه...؟؟

ممكن نقول سراب...؟؟


ولا ممكن رغبة الواحد فى الحب تتدفعه للأحساس بحب كاذب..؟؟


زى الحمل الكاذب كده


هههههههههههههههههههههههههههه


( دى ضحكة عشان اللى مش فاهم )


طب الواحد يعمل ايه فى الحالة دى...؟؟


يعمل الصح ويبعد عن مصدر الأحساس بالوهم ده وخلاص


ولا يعمل عبيط ويحاول انه يعيش الوهم....وكمان يستمتع بيه..؟؟


ما اكيد الطرف التانى كمان عامل عبيط


الناس كلها النهاردة عاملة عبيطة


تعمل ايه لو عارف الصح من الغلط بس كل ذرة فى كيانك بتدفعك ناحية الغلط...؟؟


قد كدة الواحد وحيد


ههههههههههههههههههههههههههههه


حلوة الواحد وحيد


ليه ياربى مخلقتنيش اتنين.....؟؟؟؟؟!!!!!!!؟؟؟؟؟

Friday, August 17, 2007

اليها....وإلى نفسى

مازالت صورك التى احتفظ بها فى عقلى تطاردنى
ملامحك
ابتسامتك البسيطة
دخان سيجارتك وهو يرفض ان يفارق شفاهك
مشهد لكى وانتى تضحكين معى
تنادين اسمى....وتقفذين لتحتضنى رقبتى
هل تفعلين كل هذا معه؟
هل تضحكين معه مثلما ضحكنا..؟
هل يقبلك مثلى...؟؟
هل عشق يداكى كما عشقتهما....؟؟
كنت اقول لكى.....استطيع ان امضى عمرى كله فقط اقبلك...؟؟
هل احس بكى مثلما فعلت...؟؟
هل ضمكى الى صدره بقوة مثلى...؟؟
هل وهل وهل.....الف سؤال يطاردنى
والف صورة لكى تدور فى عقلى
لو قابلتك فى زمن غير هذا....ومكان غير هذا...لم اكن لأتركك لحظة واحدة
هل فهمتى هذه الكلمات...؟؟
هل فهمتى حين تراجعت عن وعدى بأن اتركك...؟؟
هل فهمتى ان مثلى حين يتنصل من وعد قطعه فهناك فى الأمر شيىء
هل فكرتى اننى ربما احببتك..؟؟
وعشقت القاء رأسى على صدرك
هل فكرتى..؟؟
كم ارغب فى ان ارفع هاتفى واطلبك كما اعتدت منذ فترة
ولكنك لم تعطنى مبررأ واحداً لأفعل ذلك
اريد ان اسمع صوتك
اريد ان اضمك ولو للمرة الاخيرة
اعطيتنى كل شيىء
واخذتى كل شيىء
حتى الذكرى
قتلتيها
سأقاوم هذا الضعف
حتى لو كان فيه عذابى
اخرجى من عقلى ومن قلبى
فلا مكان لكى عندى

Tuesday, August 14, 2007

كوكب من المرايا


ادار مفتاح السيارة

بدأ يتحرك
وهو يحاول ان يتجاهل رائحة عطرها
التى انطلقت لتملىء المكان كالعادة

رفع المرآة قليلاً حتى يتفادى عيناها
واكتفى بصوتها المألوف لأذنه
والذى راح يخترق كيانه اكثر من اى وقت مضى


******



اذا اردت شيئاً بقوة فأطلق سراحه


فإن عاد اليك....فهو ملكك إلى الأبد



وإن لم يعد...فإنه لم يكن لك من البداية

******



كانت بين ذراعاه



تحتضنه....ولا يشعر



كانت الأخرى فى قلبه..فى عقله



حين لمس يداها



تذكر همسها فى اذنه



حين قبلها لأول مرة



وجد شفاهه تبحث عنها هى



وحين لم تجدها...إستكانت



وحين اخذتهم النشوة



تذكر كيف كان يكتفى بإن تضمه إلى صدرها بقوة



قاوم كل تلك المشاعر



حاول ان يكون حيواناً ولو لبعض الوقت



حاول ان يكون مثلها هى



وحين لم يستطع ان يستمر فى هذا الدور



ادرك انها صارت تجرى فيه مجرى الدم



***



كوكب من المرايا






لاتخاف



اهدأ....وحاول ان تختار



فأنت فى العالم السحرى



ارض العجائب



والأسرار



انت فى وطن المرايا



ارض العواكس



والاحجار
هنا

لا سجون لدينا



لا تعذيب



ولا اسوار



انت وحدك الملك



تخفى ما تريد من نفسك



وتظهر ما تختار



افتح عيناك وفكر



ماذا تريد ان تكون....؟؟



***



اغمض عيناك واختار



احلم



اتريد ان تكون فارساً..؟؟



تحمى الدروب



وتنقذ الاقطار



ام تحب ان تكون حاكماً عظيماً...؟؟



تخشاك القلوب والأنظار



انظر هاهنا...فى هذه المرأة



سترى نفسك عالماً جليلاً



وهنا وحش جبار



قد تريد ان تكون قطرة ماء



تعيش بين السحب



فوق الغابات والأشجار


فقط تذكر دائماً



انك انت الملك وحدك



فهنا لا يحكم ضمير



ولا قلوب تختار



إليها.............؟

Thursday, July 26, 2007

إيمان!!!!!!؟


هل املك من الشجاعة ان اكتب عنكِ..؟

***

ايه هوه الحب...؟؟

نوع من انواع الضعف

ضعف تحبه اكتر من اى شيىء تانى

طب ليه ضعف...؟؟

لأن ببساطة انا كراجل...المفروض انى انسان قوى

قوى فى الشغل ...فى الشارع...فى البيت مع اهلى...حتى مع اصحابى المفروض اكون قوى

اظهار الضعف فى اى من المشاهد دى بيسبب مشاكل اكتر من الراحة اللى ممكن تعود عليك

الراحة اللى بتيجى لما تعيط مثلاً

وانا مبعرفش اعيط

ايمان...؟؟

مين ايمان...؟؟

بنت وحيدة عايشة مع امها لأنها من اول ما كبرت وابوها مع زوجة تانية

دايما اغلب القصص دى بتبدأ بإنفصال

الأب اتجوز...وساب الام مع البنت

الام ربت البنت على كره الأب...واى اب...واى راجل

بس فجأة ظهر عريس للأم....وفجأة الأم وافقت

واتقلب الموقف المقدس المعادى للرجال

طب ايمى....كان عندها 17 سنة فى الوقت ده

فوجئت براجل غريب فى البيت و بأمها بتتخطف منها

طب هى اصلاً صدقت العقَد اللى كانت امها بتحاول تزرعها فيها

لا...قالت اشوف بابا واحكم

اشوف الرجالة واحكم

حاولت تشوف أبوها...راحت لبيته التانى رد عليها من ورا الباب

وكانت صدمة ليها انه حتى مرضيش يقابلها

شوية الاب تعب ودخل المستشفى فى حالة خطيرة...طلب يشوفها وكان السبب فى الطلب ده انه كان عايز يوصيها على اخوتها

من الزوجة التانية...ما ايمان كبرت...وممكن تشيل مسئوليتهم لو حصله حاجة

ومحصلوش والحمد لله

وكانت دى اول واخر مرة تشوفه

طب الأم....؟

بسبب سن ايمان...وبسبب التنازع على اهتمام الام..ووقتها بين الزوج الجديد والبنت

قرر الزوج انه يستقر فى بلد اهله فى الفيوم....والام تعيش على خط القاهرة الفيوم

والبنت تبات لوحدها عادى

ما ايمان راجل

ومبتعملش حاجة غلط...والتليفون موجود

تحس كدة انه فيلم عربى قديم

لسه فى ناس كدة

طب ايمان....؟؟

فى جو الكلية او المعهد معرفش لحد دلوقتى بس عموما عرفت ناس وشباب وخروجات و و و

بحدود...ايوة بحدود

بس اى حدود...؟؟

حدود الدين ولا الأسرة ولا المجتمع...؟؟

واشتغلت فى مكتب سفريات...وبدأت تدوب فى الدنيا إلا برة البيت

البيت اللى مش موجود

اتعلمت ازاى ان اى راجل بيقابلها او حتى شاب بيبصلها ازاى

ووسط شلة بنات جمعتهم نفس الظروف

شافت وعرفت وشربت

بحدود برضة....!!!؟

وبعد كل ده

قابلتها انا

لسه مكملتش 22 سنة

جميلة

شكلاً وشخصاً

عمرك ما تزهق وانت معاها

جميل

وبعد كام مقابلة عرفت القصة دى حته حته

تعاطفت معاها لأقصى درجة

وحاوت بكل الطرق والكلام انى اقولها ان الدنيا كدة

وان كل الناس اللى انتى شايفاهم حواليكى دول

مهما كان مستواهم فمشاكلهم اكبر مما تتخيلى

حاولت

وهى بإصرار حاولت تحسسنى اكتر بمأساتها

العلاقة بينا كانت مش اكتر من خروج وسهر فى اماكن عامة سوا

ممكن كنت بحاول اعوضها

ممكن كنت مستمع بانى اساعد انسان اضعف منى

بس العلاقة بدأت تخش فى سكة مش بتاعتى

خفت تتعلق بيا وانا اصلا سايب البلد وماشى

وهى عارفة ده

حسيت انها بتتعمد تكسب تعاطفى نحيتها...ممكن لانها عارفة انه السبب الأول فى استمرار العلاقة

وبدأت احس انى غلط

وبدأت احس اكتر انها بتتعمد كل كلمة بتقولها

عارفة بالظبط الكلمة دى هتسمع عندى فين

والانسان لما يكون ضعيف فى جانب من شخصيته بيحاول دايما انه يخفيه

لأنه عيب دائم...مثلا لو اتولدت لقيت ابوك تاجر مخدرات مثلاً

مش هتمشى تقول لكل الناس انا ابويا كذا ولا كذا

ويمكن كانت زى كل البنات اللى عرفتهم على اختلاف اشكالهم وثقافتهم

بتحاول تحطك فى خانة العريس

حتى لو ظروفك غير ظروفها...حتى لو عارفها فى الشارع

بتحاول...وبسهولة بتعرف انك مش منهم

فتبقى اى حاجة تانية انت عايزها غير فكرة العريس دى

تبقى صاحب...حبيب...عشيق

انت وحدودك...وهى وحدودها

المهم اختفيت...بعد موصلّت تقريباً كل الكلام ده ليها بطريقة او بأخرى

خايف عليها...انا مش هاخسر حاجة بس لا

مش هيبقى ابوها وامها وجوز امها وكام واحد قبلى وانا عليها

حتى لو بإرادتها

قفلت موبايلى واختفيت...وهى فهمت ده

وساعدنى انى سبت شغلى استعداداً للسفر

عرفتها 3 شهور

واختفيت 3 شهور

قاومت فيهم الأحساس الغبى بالوحدة اللى عايش جوايا

وقررت انى مكسرش قاعدة رقم اتنين

" لا تستعدى علاقات من الماضى "

بس عن طريق صاحب مش صاحب

جابت هيا نمرة البيت...واعلنت انها مش هتستسلم

اما انا...؟؟

اتلككت وكلمتها تانى...وقابلتها تانى وتالت ورابع

سفرى اتأخر...والقاعدة رقم اتنين غابت وراء الشمس

***

فى ناس لما تقابلهم يأسروك بحاجات معينة فيهم

ماهو مش لازم تفضل انت الواد الجامد الصايع اللى قلبه من يوم اتكسر وهوه زى الحجر

فاهم الناس كلها

وجايب من الأخر

انا اصلا مش كدة

وايمان برغم انى عارف ومتأكد ان فى حاجات كتير جداً فى حياتها مخفية عنى

إلا انها شدتنى

شدتنى بعد فترة عرفت فيها بنات كتير

شغل وعيلة وأصحاب

وولا واحدة شدتنى اصلا انى اخد نمرة تليفونها

طب ايمان وحشة ولا حلوة...؟؟

فى نظرى حلوة

ولو كنت مخدوع....فانا مبسوط

لأنى بقالى فترة كبير متخدعتش

***

عارف الناس اللى لما تجيب سيرتهم عينيك تلمع

عارف الناس اللى بتكسر قاعدة فى حياتك عشنهم

بلاش

عارف ايمان..؟؟

اللى لو كنت قابلتها فى ظروف غير دى

وفى زمن غير ده

كنت ممكن تقرا كلام تانى خالص هنا

اديك عرفت

***

"ايمان....اسف لأنى مقدرتش اسيب فى حياتك غير شوية ذكريات...اتمنى انها تكون سعيدة"

Monday, June 25, 2007

ربع قرن من الزمان

كل عام وانتى كما انتى
لا تعرفين اين ابتدأتى
ولا اين انتهيتى
كل عام وانتى بلا صديق
لا تأنسين الحياة
ولا تتركين الطريق

من اوراق الماضى



فى اطار الأستعداد للسفر...وقعت يدى صدفة على مجموعة من اوراقى الخاصة القديمة
والتى تحوى بعض القصص القصيرة والأشعار...وما اجمل ان تقرأ ما كتبته بعد سنوات من كتابته
سنوات تكون قد نسيت فيها الظروف والأشخاص الذين دفعوك فى يوم الى سرد مشاعرك على الورق
وفى محاولة منى للتخلص من هذه الكتابات...استطيع ان اضع هنا ما اجده صالحاً لذلك
****

المدفئة



انظر الى نار المدفئة

التمس شيئاً من نفسى

ابحث عن شيئاً منكِ

ترتجف يداى

اقترب اكثر

ابحث عن دفئكِ

عن اسمكِ

تلفحنى النار

ولا ادفىء
يزداد البرد....ويعصرنى

تموت الكلمات منى

افتقدك

قالوا ان الموت يفرق

فهل فرقنا الموت...؟

لا.....ولكنى افتقد لمستكِ

عيناكِ....بسمتكِ

افتقد دفئكِ حبيبتى

اقترب اكثر...ارتجف

لا فائدة..ارتعش

اقترب..واقترب

اشعر بالنار تلامسنى

ولهيب الجمر يعانقنى

وصراخ الناس من حولى

مجنون يحرق نفسه

لا ابالى

ابحث عنكِ وسط النار

ابحث عنى

لا اجدك

البرد يزداد...ويقتلنى

والجسد يتخاذل...يخذلنى
واشعر بجسدى يسقط

وصراخ الناس فى اذنى

مات المجنون


*****************************************

الى صديق

لما تحس ان عينيك تايهة

ما بتحلمش

لما تحس ان شفايفك ناشفة

ما بتضحكش

لما تحس ان ايديك عاجزة

مبتوصلش

اوعى بدمعة تقول مس قادر

ومتقدرش
***

لما الموجة تهد البيت اللى بنيته

متعيطش

اوعى تسيب الشط وتجرى

ومتفهمش

لما الموجة بتيجى..بيجى لغيرك خير

ولما الشمعة بتبكى..بيجى عليها الطير

لو سألوك عن ضحكة قلبك

مبنسمعش

اوعى تقول الضحك نسيته
ومتضحكش

اسكت

وارسم على وشك ضحكة كبيرة

مبتخلصش


********************************

حين تكلمت حبيبتى



قالت

اننا لم نتفق

وان القصة انتهت

وسكت الكلام
قالت...ان النار خمدت
وان الشمس غربت
وان حلمنا مات

تحت الأقدام

قالت وقالت

وانا انظر اليها

ابحث فى تلك العين

التى امتلئت بالدموع

عن وعود بينى وبينها

طرزتها الليالى

ودمرتها الأيام

ابحث عن حبيبتى

بين اناملها...وتحت دموعها

وخلف اصداء الكلام

وحين عجزت ان ادركها

وجدت صوتاً يشبه صوتى

امازلت تريد ان تسمعها..؟؟

**************************************


انتحار




دقات الساعة تحاصرنى...صوت الكاسيت..وضلام يطلٌ على من النافذة.......اطفىء السيجارة


هل يأتى الليلة....؟؟


لا اعرف...ولكن ليته يفعل


تدق الساعة...كثرت دقات الساعة وكأنها تعدوا خلف الزمن


صوت المطر يصارع زجاج النافذة....الجو الخانق


وصوت المغنى البذيء....احمل القهوة واشربها


تدق الساعة.....ويدق الباب


لا اتحرك


الشاى يغلى....والساعة تدق بأستمرار


والباب يدق....وصوت المغنى يدوخنى


اصوات ضحكات تأتى من الخارج...وكانها اصوات شياطين


الماء يتسرب الى الداخل


لا اتحرك...الساعة تدق بعنف


الباب يكاد ينكسر....والضحكات تزداد


لا اتحرك...ولا اخاف....بل خفت الأن


الشاى لا يتحرك...وانا اغلى....أو العكس


الباب يكاد ينتهى...اخاف اكثر....دموعى تغرقنى


والضحكات صارت صراخ


ينكسر الباب


ويدخل الظلام والمطر والرعد والبرد


الساعة تدق بشدة


اصرخ



انه الموت



**************************************



ثياب قديمة




ابتسمت ابتسامة واهنة حين رأيتها تداعب نفسى بكلماتها الرقيقة...كانت مليئة بالحماس وعدم اليأس

فلم تستسلم لحزنى وصمتى...وقررت ان تخرجنى من سجنى

صدقت حين قالت اذا كان الشر موجود والخيانة قائمة...فهناك دائماً الخير والوفاء

فالحياة كلها ليست حياتى...والنساء كلهن...لسن كحبيبتى القديمة

اعجبت بها....وتعلقت بها كثيراً...ثم قررت اخيراً ان اخلع ثوب الحزن...وتركته فى بيتى القديم

وتركت البيت كله...وتزوجتها فى بيت جديد...عشنا عاماً كاملاً فى سعادة

ثم لم تلبث ان ظهرت الحقائق...ولأول مرة...لا...لثانى مرة اصدم فى انسانة احببتها

كانت متذمرة...غاضبة....ذات احلام مادية كبيرة

طلقتها...وتزوجت آخر...عندئذ...ذهبت الى بيتى القديم...وفتحت دولابى القديم

ثوب الحزن وارتديته...منتظراً من تأتى لتخلعه لى


*******************************

الجسد الصامت



احسست بذراعيها تلتف حولى...اردت ان اتخلص منها ولكنى لم استطع...كنت اريد ذلك ولكنى لم افعل شيىء
سكتُ...وسكنتُ...كأنى جسد صامت...كأنى تمثال من الحجر...استمر ذراعاها فى الألتفاف حولى فى رقة
ثم فجأة...ظهرت مخالبها...ووجدتها تحاول ان تخنقنى...احسست انها النهاية...ورأيت شبح الموت قريبا جدا منى
وهنا فقط قررت ألا استسلم..دفعتها بقوة...وادهشنى ان وجدتها لا تقاوم...دفعتها بيدى فسقطت على الأرض صامتة
اقتربت منها...فوجدتها جسد صامت....تتنفس...ترى...تسمع...ولكنها لا تتحرك
قررت الانتقام...حاولت خنقها...فوجدتها لا تقاوم...قتلتها وبكيت
دفنتها...وعشت حياة اسعد بعد دفن هذه الذكريات الحزينة

**************************


احياناً يكون من الحكمة موت بعض الذكريات مع اصحابها

ومن الحكمة ايضاً ان نبقى على بعض ذكرياتنا داخل قلوبنا...حتى لا ننسى كيف كنا

وحتى لا نضيع وسط الزحام

Sunday, May 27, 2007

بدون عنوان

خلاص
الفيزا جت
والوقت فات
لمّ لبسك
والحاجات
هات هدومك
ويا صورتك
ويا احلى الذكريات
وحط كله
جوه شنطة
عليها اسمك
وجنبه شرطة
اسم بلدك
ويلا اطلع على المطار
***
هات سنينك
هات حنينك
وكام كتاب عليها اسمك
حتى اهلك
هات صورتهم
ويا صوتهم اللى فى خيالك
يمكن هناك
تعرف تشوفهم..جوه عقلك
هات صحابك
جوه قلبك
هات كمان كل اللى حبك
خد من كل واحد فكرة
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
اوعى تنسى
هات شارعكوا
قصدى يعنى ذكرى منه
ومن سريرك
ومن مريتك
بص فيها
واوعى تنسى اللى فيها
ومن خواتك
ومن ولادهم
كله كله
هات منه حته
أو حتى كلمة
تفتكرها وانت قاعد
هناك لوحدك
هات معاك كمان حكاية
من طفولتك
وحتة اكبر من رجولتك
هات كمان ريحة حبيبتك
لو فاكرها
ويا ريحة حد منك
زى امك
وأكل امك
اوعى تنسى تبص فيه
وتشم منه
يمكن ترجع متلقيش
لا اكل امك
ولا حتى امك
وحط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
هات معاك كل اللى شفته
جوه بلدك
جوه عقلك
وحط كله جوه صورة
فيها نيلها
ويا ليلها
ويا أحلى حاجة فيها
كل ناسها
فيها اهلك
فيها عمرك
فيها احلى يوم عرفته
فوق مقطم
تحت سعد
فى الميدان
وسط قهوة
او يوم فى شرم
من زمان
حط كله جوه شنطة
عليها اسمك
جنبه شرطة
اسم بلدك
ويلا اطلع على المطار
***
لو حاولت تجيب ده كله
وفى وسط شنطة..تحط كله
مش هتقدر
غصب عنك مش بإيدك
هتسيب ملامحك
وابتسامتك
وحضن امك..ولون عينيها
ويا صوتك وسط اهلك
ويا ضحكة من صحابك جوه ودنك
تحس بيها
ويا حتى سقف اوضتك
صوت شارعكوا
لون طفولتلك
هتسيب ده كله
ولا أقولك
حطه كله جوه قلبك
وحط قلبك جوه علبة
عليها اسمك
جنبه شرطة
اسم بلدك
ويلا اطلع على المطار
وهناك تسيبه
ولما ترجع
هتلقيه..وسط الف علبة تانية
عليها اسم زى اسمك
جنبه شرطة
اسم بلدك
اللى يمكن متكنش
بلدك