Friday, August 14, 2015

قواعد الصالونات العشرة

جواز الصالونات مش اكتر طريقة في كل المجتماعات عشان تخلي اتنين يقابلوا بعض
اتنين...لأي سبب من الأسباب مقابلوش نصهم الحلو, شريك حياتهم , بالصدفة في حياتهم
 فالمعارف المشتركة بتحاول تتدخل و ترتب اللقاء ده...ممكن في صورة خروجة عادية في كافيه...او علبة شيكولاتة و صالون مع كوباية مانجة

موضوع مين هما المعارف المشتركة ده مهم جدا, وقد ايه هما عارفين انت بتدور علي ايه وهي بتفكر ازاى
مهم ان المعارف دى تكون فهماك...و فهماها...ده بيدى فرص اكتر لنجاح الموضوع

من خبرتي المتواضعة...في عشر نصايح للموضوع ده


ألاولي: ألغاية تبرر الوسيلة
يعني مش معني انك هتشوف واحدة عن طريق الصالونات...يبقي هتشيل اللي هتلاقيه
الموضوع مش اكتر من لقاء مترتب..وسيلة يمكن تساعدك انك تلاقي اللي بتدور عليه...

الثانية: انت عايز ايه؟
مهم قوي تبقي عندك فكرة انت عايز ايه في شريكة حياتك. بقول فكرة عشان فب النهاية البنات مش بيتشكلوا بناء علي رغباتك
و عشان برضوا انت لما تعجبك بنت مش هتكون ابدا زى مانت عايز بالظبط. المقصود تفهم اولوياتك, اللي من غيرها مينفعش

التالتة: متقولش لا لأي حد جايبلك عروسة
خبط علي كل باب...انت بتسعي في الحلال, وده مش عيب. صدقني, عمرك متتخيل نصك التاني ممكن يكون مستنيك فين

الرابعة: متخافش
المغص اللي هيجيلك قبل الميعاد بساعتين, او وانت قدام النادي, او طالع سلم البيت. الاحساس ده طبيعي جدا.
افتكر دايما ان الموضوع اصعب كتير علي البنت

الخامسة: تحلي بالروح الرياضية
يعني لو واحدة مرتحتش معاك, مش اهانة ليك. زي مانت لو مرتحتش ده مش اهانة ليها. في البدايه اللي بيحكم هوه القبول
بس عموما خليك بعيد في كلامك عن ما يحسب في بند الاهانة. يعني متبررش عدم القبول بكلام كبير من نوع: هايفة, وحشة, مغرورة...الخ. خليك شيك حتي في رفضك

السادسة: نحن نكذب احيانا...ونتجمل غالبا
مش كل الحلو اللي هتشوفه حلو بجد...وفي عيوب انت لسة هتشوفها...فهدي الحماس

السابعة: خلي بالك من طنط
امها مش اكتر منها بعد كام سنة...خد بالك من كلامها...معاك و مع ابوها...جسمها..لبسها
هتشوف الدنيا احسن

الثامنة: جدد نيتك بين كل مشوار و التاني
يعني خلي دايما نيتك لله...انك عايز تعف نفسك, وتعف بنت مسلمة ...انك عايز تفتح بيت و تبتدي اسرة مسلمة صغيرة علي قدك
توفيق ربنا بس هوه اللي هيوقع في سكتك بالصالونات اللي مجتش بالصدفة

..التاسعة: اتكلم,  كن نفسك
اتكلم في كل حاجة...ممكن كلام في السياسة يفهمك دماغها...واولوياتها
البنت عموما بتبقي شايفاك انسان غريب..اللي هيطمنها انها تفهمك اكتر...فاتكلم...بدون تصنع

العاشرة: اصبر
اوعي زهقك من العزوبية يخليك تمشي في حوار انت مش مقتنع بيه. ده ممكن يوديك في مشاكل قبل او بعد الجواز اكتر بكتير من العزوبية...افتكر دايما ان افتناعك اهم حاجة...مش اقتناع اهلك...او اصحابك

اخيرا...افتكر ان الجواز شر لابد منه...وانه كاس وداير و بيلف
وعموما...اخرة كل شاب شايف نفسه ايه؟
واحدة بتزبط الميك اب جنبه في العربيه و كرسي بيبي علي الكنبة ورا
عيش يا نجم 

Thursday, August 13, 2015

فول بالبشاميل

عمرى ما تخيلت انى ممكن اتعلم الطبخ

يمكن عشان ولد بعد بنتين..فطول عمرى فى خطيب دفاع بينى وبينى المطبخ..ده بعد ست الكل

ورغم انى كنت متخيل انها قصة سهلة...ايه يعنى شوية رز...او صينية فراخ..أو...أو...أو

الا انى لما اتيلت و اتغربت..لقيت نفسى فجأة...واقف فى المطبخ...وده طبعا مش مطبخ مقارنة بمطبخ الحجة

وفى ايدى كيسين مكرونة...وقدامى حلة فى ميه بتغلى

مين كان يتخيل..انى دى تكون النهاية

نهاية الفنان الجميل..الشاب الحر...اللى عمره ما عمل حتى شاى لنفسه

الصدمة كانت كبيرة

تلاها محاولات كتيييييييييييييييييييييير فى المطبخ

وصلت لنهاية واحدة

فى ناس ليها فى المطبخ..وناس ملهاش

حاجة كده زى الرسم والكتابة والموسيقى

الطبيخ موهبة

وانا معنديش الموهبة دى

وبرغم اقتناعى انى فاشل مطبخياً

الا انى بمسك نفسى فى لحظات غريبة عليا

لو وقفت قدامها ممكن اعيط لمدة شهر متواصل

مرة فة مكتبة جرير..الاقى نفسى واقف ومتمركز فى وسط ركن الطبيخ

وعيبنى رايحة من اللبنانى الى السورى للمصرى

لدرجة انى فكرت اشترى كتاب حلو

" المواقف دى بتحسسنى ان لازم امشى بشنطة ايد فى كتفى"

اخيرا

لقيت نفسى قاعد قدام شيف معرفش اسمه ايه

عمال يخلبط وينعكى ميت حاجة فى بعض..وفى الأخر يروح ساحب طبق من ور الكاميرا...زى الفل

وانا والستات اللى متابعين البرنامج نشهق..ايه الجمال ده

Wednesday, November 21, 2012

أنا...ولا شيئ غيري

ترفع...
أسمو بقلبك قبل افعالك...
أرقي باحلامك...فوقهم
فوق من حولك
فوق كل شيئ ...وأي انسان
ففي فراغك انت، لا شيئ غيرك
وفراغك هو كل حياتك الان
اطردهم
فلا مان داخلك الا لك

Friday, April 6, 2012

أحبُكِ فكرة ...!

أحبك فكرة
ولكن حين تجسدتي...
كرهت التطبيق
كرهت كل من مروا بكي من قبلي
كرهت الطريق الذي أتي بكي اللي
لا لشيئ إلا...
لانه باعد بيننا بقسوة
وكأنكي تجسدتي فقط
لتريني استحالة
حدوثك
عزيزتي المستحيلة
احبك
والله العظيم بحبك

Monday, October 31, 2011

هكذا كان هو...

حين اخبر الجميع برغبته في الزواج من مدام ياسمين...تعجب الموظوفون!!
مدير الفرع يتزوج من اقل النساء جمالا بالبنك؟؟؟!!
كان فرحاً... يتحرك كإبن العشرين...وهو الذي تجاوز الخامسة والخمسين منذ عدة أشهر
عمراً طويلاً قضاه وحيداً...بلا زوجة ...بلا أولاد
اي نجاحات؟؟؟
ماديا ممكن...معنويا شأناً اخر
هي...متوسطة الجمال...زوج راحل...وطفلين
لماذا الان؟ لماذا هي؟؟؟!!
شغل السؤال من يعرفهم...وربما شغله هو أكثر منهم.
--------
يتذكرها تبكي
تاهت الكلمات منها وهي تحاول ان تشرح
لا تريد ان تجبره علي شيئ
لكنه لابد ان يختار
نعم تعرف انه لم يعطي وعود
نعم تتذكر انها قبلت ذلك
بحق الله كان واضحاً
حاولت ان تفهمه...ماذا بعد؟
العمر يجري...وما بينهم صار اكبر مما كان
ماذا بعد؟؟؟؟
يحبها...يسعد بوجودها حوله
شعر احيانا انه يعشقها
لكن زواج...؟؟؟؟؟
لا
احس أنها خيانة لكل ما تربي عليه
لرجل الدين الذي زرع بداخله
يتزوج عشيقته...؟
ذاب رجل الدين عشقاً...
وثار علي شرعية العشق...
رفض
أصرت
وافترقوا...
يتذكر كلمات خرجت منه في المشهد الاخير
"بعضنا كتب عليه العيش وحيداً"
لكم كان لسان حاله صادقاً
-----
انتهي الحفل البسيط
وعاد معها الي المنزل...
طارادته نظرات التساؤل في عيون من حوله
هوه نفسه لم يعرف جواباً فاصلاً
ربما تمرد أخير علي العباءة
كانت زوجته فرحة...تجولت في البيت وهي تضحك
تحكي له
تذكره
بقبلة سرقها هنا
بلمسة أذابتها هناك
اخبرته كيف ان بيته مختلف وهي سيدته
نظر اليها...تأملها
احس بقلبه يختنق وهو يقول
"إنتي طالق"

Friday, September 16, 2011

زائرة بلإجبار

هكذا هكذا هكذا...تدفعكى الأحلام لتأتى الى حيز وجودى مرة اخرى
لماذا نحلم يارب بمن نريد ان ننساهم؟
لماذا نكون سعداء معهم هكذا فى الاحلام؟
لم احلم بكى ولو مرة وكنا نتشاجر...لم يحدث ان حمل وجهكى فى احلامى الوجه البارد الذى لازلت اذكر معالمه بعد سبع سنوات
كيف يكتب الأنسان اهه طويلة عميقة؟؟
الغريب...انى وجدت نفسى متلبسا اكثر من مرة بالتفكير بكى
بل....وبعد اكثر من زيارة لكى...وجدت نفسى استعيد ما كان
وأفكر...مجرد تفكير...ان ارد على رسالتكى
رسالة جائتنى متاخرة خمس سنوات...ورد اكتب فيه فى خيالى فقط...لمدة عامين
بهذه الطريقة...سنلتقى ان شاء الله بعد الستين
:)
من منا ظلم الاخر؟
من منا فرط فى الحب المجنون؟ وفى السعادة المفروضة؟
نحن الأثنين
هذا هو ردى
هذه هى الرسالة
فالربما....كنا نناسب بعض اكثر مما كنا نتخيل
لا عن حب ...بل عن قلة وفاء
ماذا فى قلبى لكى بعد كل ما حدث؟؟ بعد كل ما مر من الوقت؟
بدون احلامى اللتى تنتهكيها وقتما تشائى
وترسميها كيفما تشائى
لا شيىء
فإن كنتى تملكين احلامى...فانا املك الواقع

Friday, April 22, 2011

كلمنى عن.........؟؟

كلمنى عن الجواز...والصالونات تحديداً
احكيلى عن الوحدة
الصداقة
وقولى شوية عن الغربة
البعد ويا الفرقة
كلمنى عن الترتيب
انك تكون منظم
محدد
كلمنى عن التأقلم
الحلو منه
والوحش
ومنه احكيلى عن العادة
لما تكون الوحدة عادة
قولى..بتبقى عاملة ازاى
كلمنى عن التفكير
التفكير الكتير
وامتى يكون مفيد
وامتى يكون خطير
كلمنى عن الناس
واحوال الناس...وغرابتهم
وغربتهم
كلمنى عن الرضا
عن الطموح
عن الفلوس
عن امتى تكون سعيد
كلمنى عن اختياراتك
وشغفك
اصرارك ضد ناسك
ضد مجتمعك
كلمنى عن هوايتك
عن رياضتك
كلمنى عن دينك
اللى يدينك
عن ربك عن صلاتك...عن صومك
واجكيلى عن جنونك
لحظات مجونك
كلمنى واحكيلى
ولو مقدرتش
سبنى انا اتكلم
بس اسمعنى
هتسمعنى؟؟؟؟؟؟؟؟؟؟؟؟؟؟؟؟؟؟؟؟؟؟؟