لأنك إمرأة؟

الستات...البنات... أو الجنس الناعم..النص الحلو
"شركاؤنا فى الكوكب..نحن معشر الرجال"
تفكيرى فى الجنس الأخر..طول عمره فى حدود الطبيعى
متربى فى مصر..فى بلد ما بين الريف والمدينة
اه كان ومازال عندى شوية رومانسية زيادة ...بس عادى
الموضوع ابتدى يكبر معايا لما سبت مصر..يكبر و يدخل فى ما يسمى" نطاق التفكير الفلسفى المتأرجح"؟
ليه....؟
شفت الستات فى السعودية...؟؟
شفت الخيالات السودة اللى ماشية ورا جلبية بيضة..ويدوب ظاهره عينيها
أو بنتين تلاته فى مول...وحاطين كل المايكب اللى تتخيله فى شريط العين ده بس
و ساعات العباية تكون مفتوحة...وتحتها جينز ...دى بقة الفاجرة هنا
الفكرة مش فى البس
بس ده بيوضح الناس بتفكر فى الست ازاى هنا...هنا اعنى السعودية
احد اكثر المجتمعات التزاما دينيا والله أعلم
فى البداية افتكرت ان اللبس..ومنع المرأة من القيادة..ومنع العزاب من دخول المولات ايام الويك اند
كل ده افتكرته دين..أو نابع من تفكير دينى
وفوجئت بنظريه تانية بتقول...ان ده جاى من تقاليد البدو...مش من الدين
اللى رجاله فى مصر بيحاربوا النقاب دلوقتى بكل سلاح فى ايديهم
النظرية دى بيأكدها مشاهد...اهمها وانت على الطيارة إلى اى بلد خارج السعودية
لمصر..أو دبى...أو لبنان..أو الكويت..أى بلد
قبل النزول..كل الأشباح السودة بتدخل الحمام...وتخرج بحاجات غريبة
لبس مكشوف..حجاب مفيش..وأكتر
وهوه هوه نفس رب الأسرة أو الزوج بنفس الجلبية البيضة..بس بينزل مصر أو لبنان وجنبه مزة
أكيد مش كله كده..بس الأغلب كده
حاجة غريبة
تبتدى تحس ان معظم الناس خايفة من بعض جوه المجتمع المقفول ده
ميقدرش يواجه حد بزوجة من غير حجاب أو بلبس عادى
"أو يواجه الهيئة طبعا - ودى قصة تانية"
بس بعيد عن اللى يعرفهم..كل شىء ممكن
أخر هذه المشاهد فتوى شفتها فى احد المواقع المناهضة للفكر الوهابى الذى تمثله السعودية
"الوهابى: نسبة لمحمد بن عبدالوهاب وهو من بدأ الدعوة للعودة لكتاب الله وسنته وساعد بطريقة غير مباشرة قى قيام المملكة السعودية الثانية"
الفتوى بتقول..انه لا يجوز للمرأة ان تدخل على النت بدون محرم..لما يحتويه النت من مفاسد..ونظراً لطبيعة المرأة اللعوب
أكيد ده فكر متطرف...بس شوف وصل لفين
ده غير منع السينما وقيادة المرأة..على اساس درأ المفاسد
والشعب بيعمل كل ده بره
تناقض..ده واحد
عزلة بحجة الحماية...ده اتنين
فكرة ان المرأة عورة....كلها...موجودة وملموسة
وصلت الفكرة...الصورة اللى عليها المجتمع ده
خد دى
بلجيكا...هولندا...والرد زون
الرد زون دى فى اى بلد اوروبى تلاقيها..ودى مخصصة للدعارة
لما كنت فى البلدين دول قولت لازم اشوف المكانين دول
فى بلجيكا حاجة صغيرة كده..شارع ونص مثلا
فى امستردام..اكبر رد زون فى اوروبا....بس الأتنين نفس الفكرة
بترينات زى بتاعت طلعب حرب عندنا كده..بس بدل الملابس و الجزم
ستات فى ملابسهن الداخلية...كل الأشكال والأعمار..والأزواق
واقفين وبيحاولوا بكل الأشكال انهم بيجذبوا الزباين
منظر لأول وتانى وتالت وهلة مخيف
أو انا شفته كده
حسيت انى رجعت لزمن العبيد
كل اللى فى البتارين دول اكيد مش واخدين المهنة دى هواية..دى ظروف وحياة وقصة ورا كل بترينة
مش بمثل...بس انت لو شفت الشارع واشكال الناس" الزباين " اللى فيه كنت هتفهم ده
التخين..والرفيع..المجرم..والمدمن...واللى معاه فلوس يدفع ويخش

انا والله كنت خايف وانا ماشى فى الشارع
منظر الناس من كل حته فى العالم...منظر مشفتوش غير فى الحرم
وفى امستردام
والمكانين فى اتجاهين مختلفين من الكون
كام واحد مريض..نفسى فى دول..كام واحد معفن
الفكرة تخيل اللى واقفة فى بترينة كام ساعة فى اليوم ومطلوب منها ايجار معين...وكل نص ساعة راجل
اكيد ده شيىء مقزز
يعنى غير افلام البرنو..والأعلانات اللى بتعتمد على المرأة كسلعة للتسويق
ادى الغرب المتقدم المتحضر...بيرجع لعصر العبيد..والجوارى
ادى المرأة..من منظور غربى
اه عندها الحرية تجهض...وتتجوز ست زيها...وبرضه الراجل عنده الحرية ان يستغلها كما لو كانت جماد
يبيع ويشترى ويأجر فيها..كما لو كانت عجلة
ده حتى الأطفال مسلموش منهم
شفت دى
فهمتها
طب حط الصورة الأولى..السعودية
وما تمثله لنا...كقبلة المسلمين...وكما يراها الغرب...الأسلام نفسه
وحط امستردام جنبها...كمثال لحضارة غربية قذرة
مبنية على كل شيى مادى
وقولى...هتلاقى احسن من مصر فين........؟؟؟؟؟؟؟؟

أخيراً
قالوا...وراء كل عظيم امرأة
"وهذا حقيقى لحد كبير"
وانا أقول
" وراء كل معقدة أو ساقطة..رجل"

أنا أتألم...اذا انا موجود..؟؟

مش من حق حد غيرى انه يقرأ رسالتك
الرسالة اللى وصلتنى بعد خمس سنين
خمس سنين...اتحولت فيهم وبقيت انسان مختلف كتير عن اللى عرفتيه
داخل بكتب وانا لسة قارى كلامك
دايما بتفاجئينى
واحنا فى الكلية سبتينى مرتين ورجعتى
وكل مرة كان عندك كلام مختلف
كلام بيلمس فيا حاجة
حاجة تخلينى احن...اضعف
بعد خمس سنين..إتفاجئت برضه :)
حاسس ان فيه موتور قديم مصدى جوايا بيحاول يدور
ومش قادر
فاجئتينى بشعور بالذنب غريب
اعتراف اجوف......بأن جرحك ليا كان اكبر غلطة فى حياتك
وانك بعد خمس سنين جواز...حصدتى طفلة...وحياة بتقولى عليا تكفير عن ذنوبك
واكبرهم ذنبك فى حقى.....؟؟؟؟؟؟؟
طب ده جرح انا اتجرحته ونسيته...؟؟
ولا محستش بيه اصلاً......؟؟
ولا انا من كتر متغيرت بسببك..بقيت شخص تانى غيره..؟؟
مقدرش أقول ان نسيتك...كنتى لسه فى بالى
وكل ما تزيد وحدتى..وحيرتى
تظهرى قدامى...زى حلم قديم وضاع منى
حلم شايف دلوقتى..انه كان ممكن يبقى سعادتى
ممكن...!!؟
عشان فى نفس الوقت وصلت بعد خمس سنين من تفكيرى باللى كان
انه مكنش حب
لدرجة انى راهنت على انك مش سعيدة
عشان انا من بعدك مش سعيد
وعشان احنا الأتنين...لما جه وقت التضحية..اللى هى عنوان اى حب حقيقى
مقدرناش
مش مهم مين مقدرش اكتر
المهم انه حصل من الأتنين
وزى مانا عايش نايم قايم الوحدة بتقتلنى
وطيفك بيجى من وقت للتانى فى احلى صورة ليكى
راهنت انك كمان كده
واديكى فجاة قدامى
باعتذار انتى بتقولى انه اتأخر خمس سنين
وكلام اجوف...ودعاء ليا باللى اتحرمتى منه
*****
فليسقط كل حبيب تخلى عن حبيبته المتعبة..تحت ضغوط الحياة
وسحقاً لكل حبيبة..تزوجت سريعا لرد كرامة..لا وجود لها فى الحب
*****
وليهدى الله كل من اعتقدت انها تستطيع ان تطرق الباب وتدخل دون اذن فى حياة حبيب قديم
مازال وحيدا
وهى تحمل طفلة على كتفها...وخلفها زواج تعيس
*****
ولتبقى انت وحيدا...حتى يقضى الله امراً كان مفعولا

هكذا انا

هوه فيه حد ممكن يكون قدره انه يعيش متغرب...؟

يعنى نزل كده من بطن امه وفى ايده باسبور

ايه الكلام ده؟

الفكرة انى مش مرتاح...محتاج اخد وقت افكر فيه براحتى

الاجازة هنا فى مصر...فيها الف حاجة تشغلك

الف مليون حاجة عايز تشبع منها

مش عايز تفكر

عايز تحس

ولما ترجع غربتك...تلاقى نفسك مخنوق

خنقة تخليك مش عارف تفكر

تقول استنى لما انزل مصر

وكل الهموم اللى شايلها على كتفى دى ارميها

تنزل وتعود ريما لعادتها القديمة

طب ايه؟؟

الفترة دى محتاجة قرار..مكمل فين...؟

اكيد برة مصر...لان اللى شايفه جوه لا يسر عدو ولا حبيب

انا اتكلمت عن الموضوع ده هنا قبل كده

عن الحيرة فى الخطوة الجاية

ورغم ان الحيرة لسه موجودة...إلا ان الوضع اختلف

على الاقل الالم اللى حسيته من فكرة ان قدرى انى اتغرب...قل شوية

ليه لا

انا اصلا طول عمرى حاسس انى هعيش برة..اوروبا مثلا

واقعد اسمع فيروز وام كلثوم فى عز البرد عشان ادفى

والله كل ده كان عايش جوايا

ومعاه كنت دايما حاسس انى هرجع بلدى بعد سنين طويلة

بعينين اللى بيشوف ايه اتغير وايه جديد

دايما حاسس انى هشرح لأولادى تفاصيل حياتنا

مش حاسس انى هتجوز واحدة مش مصرية

اد ما مركز فى تصرفات الناس وحوارتهم عشان حاسس انى هحكى عنها

ممكن يكون ده حلمى..وبقى قدرى

او العكس

الاحساس التانى الغريب اللى واصالى قوى الأجازتين دول

الصيف والعيد

انى لازم انجح

اى كان اللى هعمله فى حياتى..ان شاء الله لازم انجح

ولو حتى فشلت..لازم مرجعش

لسبيبن

الاول انى طول عمرى ليا شخصيتى المستقلة عن اهلى

وليهم تعليقات كتيرة على تصرفاتى

ممكن مش فى الشغل...بس فى الحياة

الجواز مثلا...اصحابك...خروجك

حاجات كده

والمشكله انى جربت مرة طعم الفشل..لما السفر اتاخر..وسبت شغلى هنا

وقعدت فى البيت خمس شهور

وبرغم انه مكنش فشل فشل..دا انا مستنى فيزا

بس الشعور العام كان مواساة

ودى الحاجة التانية

مواساة تقتلك

وسحابة من نوع اننا مكناش راضين اصلا عن حياتك

الاتنين بيزودو مشكلتك مش بيحلوها

ان شاء الله لازم انجح..ومحسش الشعور ده تانى

بحس دايما وانا فى البيت انى فى حاجة بتشدنى

بتخنقنى

لدرجة بقيت عايز اتجوز عشان استقل بحياتى

وعلى قد مبيوحشنى اهلى والتليفونات بينا مبتبطلش من اول ما اسافر

على اد ما يومين بيخلونى مش قادر

عايز اخرج

هما شايفينى مش موجود....وعندهم حق

هما اتعودوا ان انا مش موجود

واخويا اللى اصغر منى...مع جوز اختى ..خدوا مكان الأبن الكبير الغايب

المتغرب عنهم حتى من قبل الغربة

والأبن الكبير لوحده

من اول ما دخل الدنيا وهو لوحده

بيفكر لوحده...بياخد قراراته لوحده

ودلوقتى لوحده اكتر

لو فيها اكتر

وبجد مش عارف مين السبب

هما سابوه لوحده...فتغرب عنهم

ولا هوه اتغرب ...فهما سابوه لوحده

مش فارقة

هما لقوا حد تانى يحل محله

هو اكيد مش هيلاقى حد يحل مكان اهله

هما بقوا مع بعض...ومش مفتقدينوا قوى زى زمان

هوه لسه لوحده

حتى اصحابه...اللى يمكن كانوا سبب من اسباب غربته عنهم

راحوا كل واحد فى بلد

وهوه فضل لوحده

لا اهل...ولا اصحاب

اسطورة...زى ادهم الشرقاوى كده

ولد وحيدا

ليعيش وحيدا

ويموت..اشد وحدة

الوحيد ده دلوقتى لازم ياخد قرار

والقرار اللى منطقى ياخده

هياخده على الوحده الصح

على بلد لا دينها دينه

ولا لغتها..لغته

نرجع تانى نقول

هوه فيه حد ممكن يكون قدره انه بعيش متغرب...؟

قصدى وحيد...؟

كان صديقى...او هكذا اعتقدت..!!؟

اقلع جذور الحب..من قلبى شد

لا تخلى ليك ولا ذكرى..ولا حتى ود

ناس تدفى قلبها...بقلب الصديق

وناس لكل شىء جميل...تهوى تهد

وعجبى

صدفة

كلنا بنحلم بعالم مثالى

أو عالم جميل

مثلاً

جميل قوى لو بقيت مرتاح فى الشغل بالشكل ده

جميل قوى لو ده كان فى مصر...والغربة انتهت

جميل اكتر لو معايا فلوس كتير وانا بشتغل فى مصر

ووسط اهلى واصحابى

ويا سلام..لولقيت الأنسانة اللى بدور عليها

كتير...؟...صح؟؟

طب حاجة واحدة بس

حاجة واحدة من اى حاجة فى دول...تبقى زى ما أنا عايز بالظبط

كتير..؟

طب حاجة اصغر

حلم أصغر

صدفة صغيرة

****

هو انا كنت قليلة الذوق قوى...؟

ما انتى برضة متعرفيهوش....اووف

سكتت شوية...... وبعدين حست انها مهتمة بالحوار زيادة عن الزوم

فتحت الموبايل..وقالت اكلم نهى اطمنها

***

ايه ده..؟؟

بنت زى د ى واقفة فى حتة زى دى...ازاى..؟

قرب وفتح الشباك

محتاجة مساعدة...؟ -

نظرة استغراب مع يأس منها وهى بتقول

أكيد محتاجة...امال واقفة هنا ليه..؟ -

سورى ان بس محبتش اكون متطفل -

وصوت باب العربية وهو بيتقفل

خير......؟؟ -

مش عارفة...ومحتاسة..وحاسة انى هعيط -

لا..امسكى نفسك كدة -

احسن دول يكلونا انا وانت هنا

زادها الكلام خوف

قطعه صوت الموبايل بتاعها بيرن

ايوه يا نهى..حاتم رد...؟ -

-لا...شكله نايم...كلمى طارق خليه يجيلك...انا معييش عربية وهتجنن عليكى

خلاص خلاص ...بيأس....انا هتصرف -

فى الوقت ده هوه كان فتح الكبوت وحاول يفهم اى حاجة

مفيش اى حاجة..يحاول يدور...ولا صوت مارش حتى

العربية ميتة

انا مبفهمش فى العربيات قوى بس واضح انه حوار كبير -

امال وقفت ليه اصلا -

ايه ده..؟ ايه قلت الذوق دى...؟ -

اتشد...وهدى لم حس انه بيزعق لبنت

بصى...انتى زى اختى...وانا مش هسيبك هنا..؟؟ -

فى حد جايلك...؟

فى حد...؟؟

لا -

خلاص احسن حاجة تسيبيها زى ما هيا كدة وأوصلك -

ايه..؟؟؟؟

***

عارف انت فتاة احلامك...؟؟ -

حاجة احلى من كده بكتير -

طب جميل -

خدت نمرتها...؟ -

نظرة استياء منه

هوه يعنى لازم اخد نمرتها -

يابنى ادم بقولك فتاة احلامك

حلم جميل

بنت..من اللى تتكسف تعاكسها من كتر رقتها

خدت نمرتها...؟؟ -

قالها له بصوت اعلى..وبنبرة تحدى

لا يا سيدى..متنيلتش -

وبعدين هى اصلا كانت متخناقة مع صاحبها

قول كده بقى -

مش ملاك..وحلم..ومش عارف ايه -

وبعدين متخناقة يعنى مفركشة..يعنى تاخد نمرتها وتحاول تساعدها تنساه

متقول انام معاها احسن -

قوم

قوم من حنبى

قام يعمل اى حاجة جوة

والتانى ندمان فعلاً انه مخدش نمرتها

حاسس انه عايز يكلمها

***

ايوه يا نهى -

انا تمام..انا فى البيت..طالعة السلم خلاص

طمنتينى..دا انا كنت هموت عليكى -

انتى ازاى متكلميش طارق وتركبى مع واحد غريب عربيته

ايه الجرأة دى

قاطعتها

خلاص يا نهى انا بكلمك من البيت..وبعدين هوه انا هركب مع اى حد كده -

انتى مجنونة

انا اللى مجنونة...!!!!؟ -

ده مشاب حترم جداً..مش عارفة استحملنى ازاى -

انا كنت قليلة الذوق معاه قوى

سرحت فى السلالم اللى طالعاها وحاول عقلها يسترجع صورته معرفش وصوت نهى فى الخلفية

طارق اصلاً...عمال يتصل دلوقتى -

قاطعتها اول ما سمعت اسمه

انا تعبانة يا نهى ولازم اقفل دلوقتى -

قفلت..و ابتدت تفتكره بوضوح اكتر

وابتدت تبتسم..مش ابتدت

رجعت تبتسم

واستغربت تانى...وحست انها عايزة تضحك

***
احمد -

صيدلى بشتغل برة مصر..وفى اجازتى

ريهام -

وسكتت..عنيها كانت فين..؟

فى الشباك..زى اول ما طلعت

طب بتشتغلى ايه...؟ او على الأقل ساكنة فين..؟ -

اعتبرينى سواق تاكسى...على الأقل لازم اعرف سا

مصر الجديدة..ميدان الإسماعيلية -

بص..عارفة انى اوفر معاك...ومش عارفة انتى مستحملنى ازاى اصلا

يا ستى هوه انا هتجوزك...استحملك...وعموما خلاص -

خلاص ايه..؟ -

عادى عادى -

رجعت تبص فى الشباك..وهوه فى الطريق

شوية

بتشتغل فين برة مصر..؟ -

اتنهد

فى السعودية -

انتى بتشتغلى فين جوة مصر؟

جابكو -

مهندسة..؟ -

اتصالات -

سكتوا

تليفونها عمال يقيد ويطفى

حد بيتكلم وهى عملاه سايلنت

حس انها ممكن تكون خايفة...قال مزعجة احسن من خايفة

هوه سابك..؟ -

رماها بغباء وهوه متوقع صوت عالى بعدها

هوه مين ده...؟ -

سألت ببرود مسطنع

اللى المفروض كان يجيلك وانتى محتاسة كدة -

تجاهلت الفكرة كلها

انا بابا وماما كبار فى السن...ومينفعش اصحيهم دلوقتى -

وانتى اخر العنقود...؟ -

ايوة -

اخواتك طبعا متجوزين وعايشين برة -

بصتله بإستغراب..لا عايشين هنا..وسكتت

سكت...وهوه متأكد اكتر من الأول انه عمره ما هيفهم الجنس ده

عينه جت على البنزين...هيحتاج يمون..ولا هتوصله

لقى نفسه فى نقاش ملوش لازمة...همون

دخل بنزينة...وعشان دى عادة

اكتر منها انه يديها فرصة ترد على التليفون براحتها

نزل من العربية...ووقف يتابع العامل وهوه بيشتغل

بنزينة فاضية...وفوطة صفرا...بتلمع فى عربيته..وهى بتتكلم فى التليفون

***

ضحكت قوى لما افتكرت نهى وهى عمالة تقولها دورى على الرخص وهوه بره

اى حاجة تاخد منها رقم العربية

بصت فى الشماسات ملقتش حاجة

بصت عليه...طوله وقربه من العربية مخليه مش شايف هى بتعمل ايه جوه

هى مش مقلقة...بس نهى مقلقها...هى عبارة أصلاً عن كتلة قلق

افتكرت أشعاره

وابتسمت..لما افتكرت ازاى طلبت منه تفتح الاب توب بتاعه

ايه ده...؟ -

بتكلم نفسها

وازاى هوه وافق اصلاً

انت بتسمع كلامى ليه كده...؟ -

بسمع كلامك...؟؟ -

بصى...انتى قلقانة..وانا خلاص ادبست وعملت شهم ووقفت -

لو انك تفتحى الاب توب ده هيطمنك اوك

جو اون

فتحت..وهى مش فاهماه..هوه نفسه مكنش فاهم..هوه ليه بيعمل كده

ولا هوه متعمد..انها تفتح الاب توب

كل ده..هى بتفتكر

ركزت قوى قدام المرايه وكل الكلام ده بيجى فى عقلها

ركزت اكتر لما خدت بالها ان عينيها مش حمر..ولا مليانة دموع

زى ما كانت..قبل..ما يقف هوه..ويسأل

محتاجة حاجة..؟

***

جريئة جدة -

حادة كدة

ضعيفة جدة جدة

واثقة فى نفسها جدة

ضحكتها ..مش هقولك

لقى صاحبة بيبصله جامد قوى..وعلى وشه ابتسامة غريبة

ايه..؟ -

بتبصلى كده ليه...؟ -

انت بتتكلم هنا بطريقة غريبة قوى -

ضحك ضحكة حفيفة

انت عينيك بتلمع-

شكلك كنت مبسوط وانتى بتوصلها

يوووه...مش الفكرة خالص -

بس فعلاً بنت ظريفة..وغريبة

تخيل انها فتحت الاب توب

ودخلت جوة فايلات شغل

والشعر

و الشعر؟؟؟!!؟ -

ما نا بقولك جريئة -

وانت سبتها تفتحه ليه؟ -

عادى..انا قولت اطمنها -

يانهار ابيض على الرجالة -

لما تقابل بنت حلوة...تتهبل

مدتهاش العربية ليه بالمرة...؟

ياعم انتى مش فاهم..مش فكرة حلوة -

انت حمار اصلك

انا اللى حمار..ولا انت اللى زبون -

تفهم انت ايه فى المشاعر النبيلة...؟ -

نبيلة..؟ نبيلة دى تبقى......؟ -

بس بس...ايه المستوى ده -

قاعد مع ميكانيكى

طب كمل كمل -

اكمل ايه..خلاص -

خلاص ايه..؟ -

وصلتها..وجيت -

بصله بصة معناها كمل

***

بس انت شاعر كمان..مش صيدلى بس -

اسف....احمد صيدلى وشاعر -

لا بجد..وبتكتب شعر حلو...؟ -

ماهو قدامك ممكن تقريه -

لا ...اصل انا مش بحب الشعر -

ولا القراية كلها صح..؟؟ -

لا...طبعا بحب القراية..بس مجلات مثلاً....... ساعات جرايد -

طب كويس -

شكله هوه مبيحبش القراية

مش عايزة أقولك....انا جنبه مثقفة جداً -

ضحك..وضحكت

عارف..طول عمرى كان نفسى اتجوز راجل مثقف..وشديد كده -

انا مثقف جدا على فكرة...انا كلى ثقافة -

ابتسمت

بجد..لازم الراجل يكون بيعرف حاجات كتير اكتر من الست -

اكيد -

عارفة..انا شايل هم الجواز فى الموضوع ده جدا

ازاى..؟ -

حاسس انى لازم اعرف حاجات كتير قبل ما اتجوز -

ازاى اربى اولادى...؟الدين قال ايه..والعلم قال ايه؟

الدين مثلاً...المفروض اى سؤال مراتى تسأله اكون عارف اجابته

مش اى سؤال...بس الحاجات اليومية

ده كله هى بتسمع

جميل..مشفتش شباب كتير بيفكرا كده دلوقتى -

عادى...مش معنى انى بفكر انى هنفذ...اهو كلام -

وليه متنفذش؟؟ -

مش لما الاقى الأنسانة اللى تشجع الواحد انه يعمل كده -

لسه بتدور...؟ ولا عارف هى مين..؟ -

بدور...زمان حسيت انى لقيتها وطلعت غلطان -

انا كمان..كنت فاكرة انى لقيته -

بس انا بقول ده بعد فترة..قدرت احكم على الأمور صح بعدها بكتير -

فاهمة -

بس براحتك..استنى لما تلاقيها

نفسى..بس الغربة و الأهل...والدنيا..كلهم عايزينى اتجوز وخلاص -

عشان اكون طبيعى..اعمل حاجة مش طبيعية

انك تتجوز..؟ -

انى اتجوز كدة...عشان اتجوز..مش عشان عايز اكمل مع الأنسانة دى بالذات -

فهمت...استناها -

هحاول -

انا بقى بحب بنى ادم بقالى اربع سنين..وحاسة انه مكنش يستاهل ساعة واحدة من عمرى -

طالما حبيتيه يبقى كان يستاهل -

لا -

بصى...انا اكتر واحد عارف انه سورى شاب زبالة -

بصت باستغراب

سورى...اللى يكون معاه انسانه جميلة زيك ويزعلها...يبقى -

بصتله بدهشة

جميلة شكلاً...؟ -

مش قصدى الشكل بس -

بس انت متعرفنيش..؟!؟ -

مش قصدى...بصى اى راجل يزعل الانسانة اللى بيحبها يبقى زبالة -

وهوه اكيد بيحبك

؟؟

سكتت

كأنها بتحسب..وتفتكر

هوه بيحبها فعلاً...كان..ولا لسه..ولا عمره محبها...؟

وهوه ركز فى الطريق

***

هى الدنيا وقفت ليه كده مرة واحدة...؟؟

سأل نفسه بصوت عالى وهى جنبه بتحاول تشوف السكة واقفة ليه

عشر دقايق والدنيا متحركتش

شوية سواق تاكسى مجتهد أكله الفضول.نزل ورجع بالخبر اليقين

فى عربية ماليانة دقيق..مقلوبة على الطريق...والدقيق قافل السكة

فتحوا الشبابيك.. شاكلهم واقفين حبة

طلع سيجارة..وفكر يعزم..واتردد

ممكن سيجارة...؟ -

بتدخنى..؟ سورى ...إتفضلى -

كل واحد ولع سيجارته...وبص قدامه

تعرف...؟ اهى نهى صاحبتى اللى بتتصل دى هى اللى علمتنى السجاير -

كنت بروح اروح اذاكر معاها مخصوص..عشان نشرب سوا

اصل اهلها برة البيت علطول..مفيش غير مامتها..وهى كمان بتشرب فالريحة مش مشكلة

مش معنى انك بتشربى سجاير...انك مش كويسة -

ليه بتقول كدة..؟ -

حسك بتفهمنى انت ازاى شربتى سجاير -

لا طبعاً...انت عارف انا عندى كام سنة..؟ -

لا...بس ليه السؤال..؟ -

اصلى عارفة شكلى بيدى اصغر من سنى -

دى ميزة على فكرة -

مش دايماً..الفكرة انى اكبر من انى ابرر لأى حد تصرفاتى -

حتى اهلك...؟ -

هما واثقين فيا..ومحدش فيهم بيتدخل -

جميل...بس ليه كل ده..مكنتش سيجارة -

الرجالة الشرقيين كلهم كده...بيحكموا بالمظهر..لابسة ايه..وبتكلمى مين...تشربى ايه -

الرجل لو ميغرش على مراته ميبقاش راجل -

وايه علاقة الغيرة بالسجاير..مثلاً..؟ -

ملهاش علاقة...بس دى حاجة مضرة صحية..وإجتماعيا -

اجتماعياً..؟؟!!؟ -

ايوة...بتدى انطباع غلط عن اى بنت...لزمتها ايه -

واكيد اللى ياخد انطباع عن حد من السجاير...انسان سطحى..متخلف محبش اعرفه -

سكت

كان عاجبه انك بتشربى سجاير...؟ -

مش قدام الناس -

غبى -

ليه...؟ ماهو نفس المنطق -

لا...ده انسان بوشين..انا مقولتش كده -

سكتت

انت تقبل ان مراتك..او صاحبتك تشرب سجاير قدام الناس..؟ -

لا قدام الناس ولا بينى وبينها -

ليه..؟ -

عشان دى حاجة غلط..حرام -

حرام..؟ -

طبعاً -

ما انت بتشرب سجاير...ولا هوه حلال عليك..حرام عليها -

خالص...ايه ده..اكيد انا مش انسان مسطح..مش سطحى مسطح..عشان افكر كده -

الفكرة ببساطة..انا عايز ابطل..انا عايز اكون اب وزوج ......غير مدخن

عايز انسانة تساعدنى على ده...مش نشرب سوا

ولو سجايرنا خلصت...ناخد من شنطة بنتنا وهى نايمة..اكيد لا

سكتت

تخيل لحظتها ان اهلها ممكن يكونوا بيعملوا كده...وقبل ما يحس بالذنب

لا...بابا وماما مبيدخنوش -

قالتها وهى بتبتسم

انفجر...ضحك..وهى كمان

عارفة...ممكن نساعد بعض نبطل -

مين نساعد...؟ -

انا وهى -

هى مين...؟ -

قصدى ممكن تكون الأنسانه اللى بدور عليها -

اللى اكيد مش مصاحبة...ومتخنقة مع صاحبها..وهو منفضلها

هههههههههههههههه

ممكن تكون بتدخن...ونبطل سوا..عادى

نزوق بعض للأحسن

ابتسامة جميلة على وشها....وضحكة فى عينيه

***

الكلام جاب بعضه

والفجر ابتدى يشقشق...وهما بيرغوا

عرف انها اخر النقود..ليها اخ متزوج وعايش برة

واختين عايشين..هنا بس كأنهم برة

عرف انها مرتبطة بشخص ما..زميل فى الشغل...وفى النادى..وفى المجتمع

وانها كانت سهرانة معاه..ودبوا خناقة كبيرة

هي ايه..؟ مش مهم

المهم..انه اتأكد انها مع انسان ميستهلهاش...هوه شافه كده

سابها تحكى...قاعد بيسمع

حابب..انه يسمع صوتها

***

لقت نفسها حكت كل حاجة..لواحد المفروض انها متعرفوش

رغم انها حاسة براحة كبيرة قوى..وهى معاه

حكت..والجميل انه سمعها

سمعها قوى لو دى فيها قوى

بقالها اد ايه حاسة ان محدش بيسمعها

عرفت من كلامه فى الأول قصته

بس حست انها عايزة تعرفه هوه

عرفت انه اكبر اخواته..وانه اتغرب لما البلد ضاقت عليه..وعلى أحلامه

عرفت ان طموحه كبير...وثقته بنفسه...بعد ربنا..ملهاش حدود

عرفت انه عنده حلم...انه بيعرف يحلم

حاسة..كأنها تعرفه

حاسة احساس أغرب

حاسة بإمان............!!!؟

***

خلاص

سواق بيجرى على عربيته...وناس بتركب

وصداقات بسيطة اتكونت بسرعة..ابتدت تنتهى بتفائل..ان الطريق سلك

وكان لازم يكملوا طريقهم

***

لما البيت قرب فكرت اخد رقم تليفونها

بس حسيت ان الطلب ده هينسف الحكاية الحلوة اللى عشتها معاها

حسيت ان هكون انانى...زى اى راجل ممكن يكون فى الموقف ده

راجل واطى..لو عايز يزبط

او راجل وحيد...محتاج قصة اطول من كدة شوية

عقلى ما اسعفنيش بمبرر منطقى...ولسانى سكت

***

لما وصلت اكتشفت انى مكنتش عاملة حساب اللحظة دى

الكلام خدنا...والمفروض انى انزل

حسيت بحيرة

اطلب رقمه..؟؟ ؟

هيقول عليا ايه...؟

اشكره وانزل

مكنش ينفع غير كده

يوووووووووووووه

هوه ليه الموضوع ده شاغلنى كده

ايه مالى

عادى..وابتسمت..عشان دى كلمته

***

مش عارفة اشكرك ازاى..؟

تشكرنى على ايه..قلتلك انتى زى اختى

لا بجد...شكرا

العفوا

نزلت

وهى داخلة باب العمارة..بصت وراها

لقيته لسه واقف

شاورت

ودخلت

وهوه داس بنزين

رجلٌ...من فضة

"ألراية البيضا "

مفيدأبو الغار..و فضة المعداوى

وأجمل مسلسل من الزمن الجميل

فاكرينه؟

السفير السابق وتاجرة السمك

المبادىء والقيم والثقافة......والسمك والصيادية والعربية الخنزيرة

حلقة شفتها صدفة...رجعتنى سنين ورا

أفتكرت قد ايه كنت متعاطف مع جميل راتب وهشام سليم وسمية الألفى

مع الحق ضد الباطل

أفتكرت ازاى كنت بتقطع وسيد زيان بيكسر التحف التاريخية الموجودة فى الفيلا

ازاى اتأسرت بيهم...وشفت نفسى فى المستقبل واحد منهم

إنسان صاحب قضية

قضية ضد الفساد..والبلطجة...وكل حاجة غلط

كنت صغير

بس قلبى كبير...وطموحى اكبر

وأحلامى ميسعهاش حدود الكون

واحد قال مرة...لما تشوف نفس المسلسل أو الفيلم..أو تقرا نفس الكتاب بعد فترة

بتاخد يالك من حاجات جديدة

بتشوفه بصورة تانية

العمل الأدبى نفسه متغيرش...أنت إلى اتغيرت

لما شفت المسلسل ده زمان..شفت نفشى هشام سليم

كان رسام...نفسه يسافر إيطاليا يكمل تعليمه

مش فارقة معاه الفلوس..أو تفكير المجتمع المادى اللى كانت بتمثله سميحة أيوب

دلوقتى

يااااااااااااااااااااااااااااااااااااااااااااااااااااااااااااااااااااااااااااااااااااااااه

حاجة بعيدة أوى عن اللى حلمت بيه

واحد.....اتمنى انه يكون لسه واقف فى النص

بين الصح والغلط

حتى المجتمع بتاعنا فى مصر نفسه اتغير كتير

فى الوقت اللى كانت واحدة زى فضة المعداوى دى ظاهرة

وحاجة غريبة..ومستنكرة..عشان عايزة تشترى فيلا ليها قيمة تاريخية

وتبنى مكانها عمارة

دلوقتى الناس بالألف بتموت فى عبارة...أو تولع فى قطر

ولا حد اتفاجىء

اتعاطف...غضب..ممكن

بس متوقع

عادى.....كل حاجة عادى

" هما عايشين تحت الأرض...وإحنا فوق الأرض بنكح تراب"

انا رفعت الراية البيضا بدرى

بدرى قوى

من أول من أخترت كلية...بناءً على الشغل..وفرصة العمل

الوضع اللى اتغير على ما خلصت الكلية

عارف...ان مش انا بس اللى رفعت الراية

البلد كلها يمكن

بس بشوف نفسى زمان..فى لحظة زى دى

وقد إيه كان واضح بالنسبالى الصح والغلط

اللى عايزه...وإللى رافضه

دلوقتى..مش عارف افرق بين الأبيض ...واى لون تانى

لدرجة انى خايف لتكون الراية اللى رافها فى كل حتى

فى شغلى...مع أهلى..والناس اللى حواليا

تكون مش بيضا

ويفتكرونى من اتباع مفيد أبو الغار

مع انى من جوايا

بقيت فضة حتى النخاع

وعجبى
*************************************

مش مهم

كنت مين..وحلمت إيه

مش مهم

حسيت بمين

وفهمت مين

وحلمت تكون فى لحظة فين

مش مهم

مش مهم ازاى بدأت

المهم فضلت واقف قد إيه

لما اتخنقت..؟

كام يمين حلفها عقلك

لما لامو القلب مرة

عشان ضعفت..؟

مش مهم كام نجم شدك

ولحد امتى فضلت قاعد

فوق سطح بيتكم

عمال تعد

والبرد شادد

وفضلت قاعد

قد إيه......؟

الف يوم

ولا جريت لحضن امك

لما شافت عينيك غيوم..؟

قلت يمكن أبل نفسى

أتلم احسن...وألم نفسى

ومش مهم

مش مهم...كام نجم شفته

المهم لو عرفته

ووقفت..وسط الميه وحدك

مستنى لما الغيم يعدى

وقفت ولا.........؟

جريت وقولت بكرة بدرى

أرجع وأعيد من تانى عدى..؟

وكأن بكرة شايفه قلبك

عدْ تانى

وقفت فين يابو عقل مادى..؟

ترجع..تعد...ترخى...تشد

ولما الغيم...يهل...هدْ

ويعدى يوم

من بعده يوم

ولألف يوم

وانت ناسى..يابو عقل راسى

انك عشان توصل للنجوم

لازم المطر يبل الهدوم

لا أسمع صوتى 3

عذراً....فقد ضللت الطريق

كنت أجرى بإستماتة



وعينى تطرق فوق قدمى



وضلوعى..يقتلها الشهيق



أين أنا...؟؟؟؟



ومن أنت.......؟؟؟



.....................



لم تقل شيئاً....!!!؟



أهذى أرضك........؟؟



أضللت مثلى.....؟؟؟



أم تراك...تبحث لدربك عن رفيق.....؟



كان لى يوماً صديق



يعدوا أبطىء منى دوماً



وحين سقط...لم أطيق



كنت أحسب نفسى مثله



قلبى مفتاح الطريق



أين أنا.......؟؟



وأين أهلى.......؟؟؟



كانوا خلفى...أو أمامى



صرت أهذى....أم أفيق؟؟



أين علامات الطريق....؟؟



لم تقل شيئاً



أخبرنى...؟؟



ساعدنى...؟؟



أعطنى وصفاً..دقيق



كيف أكمل رحلتى.....؟؟



أين أذهب.......وكيف أمشى....؟؟



كيف أعرف وجهتى...بين عتمات الطريق......؟؟؟؟؟